Oppositschoon (Astronomie)

Vun Wikipedia
Wesseln na: Navigatschoon, Söök
Konjunktion nds.png

As Oppositschoon warrt in de Astronomie en sünnere Konstellatschoon vun twee Himmelskörper toenanner betekent. Oppositschoon is denn, wenn se sik in en Winkelafstand vun 180° vun’n Betogspunkt befinnt.

Normalerwies is blots de Oppositschoon vun en Himmelkörper to de Sünn intressant, wiel de Himmelskörper in den Fall neemlich de hele Nacht dör to sehn is. Dorbi steiht he üm Middernacht an’n hööchsten över de Kimm. Vun de Tiet her dicht bi de Oppositschoon is normalerwies ok de Afstand twüschen Himmelskörper un Eer an’n lüttsten, wat vör Beobachten vun de Eer ut natürlich vun Vördeel is. Man, nipp un nau kummt dat mit den lüttsten Afstand tomeist nich hen vun wegen de Exzentrizitäten vun de Planetenbahnen. Dat maakt aver in’n Regelfall nich so veel ut, as dat een sik doröber Gedanken maken mutt.

Wenn twee Himmelskörpers meist to glieken Tiet in Oppositschoon to de Sünn staht, kann dat vun wegen de schienboren Slöpenbahnen (Oppositschoonsslööp) vun de bedeeligten Himmelskörpers to en so nöömte Dreefachkonjunkschoon kamen. De beiden Körpers begegent sik dreemol in’n Tietafstand vun blots wenige Maanden.

Himmelskörpers, de as de beiden Planeten Merkur un Venus binnen de Eerdbahn üm de Sünn loopt, künnt nich in Oppositschoon stahn und sünd dorüm blots morgens oder avends an’n Himmel to sehn, man nienich wiel de helen Nacht. Dorför gifft dat bi jem aver twee verscheeden Oorden Konjunkschonen, as op dat Bild to sehn is.

Sünnere Formen vun de Oppositschoon künnt wi regelmatig beobachten: Wenn de Maand in Oppositschoon steiht, denn hebbt wi Vullmaand. Man af un to kamt dat dorbi to en noch sünneren Fall, dat de Sünn, de Eer un de Maand nipp un nau op een Lien staht. Denn gifft dat en Maanddüsternis.

Kiek ok[ännern | Bornkood ännern]