Olympia

Vun Wikipedia
Wesseln na: Navigatschoon, Söök
Statue van Zeus in Olympia
Stadion in Olympia

In Olympia, enen Oort up de greeksche Halfinsel Peloponnes, stund dat grote Zeus-Hilligdoom, un Zeus to Ehren funnen hier all veer Jahr Wettkämpe statt, de Olympischen Spelen. De eersten Spelen weern vör över 2700 Jahren. Ut all greeksche Staaten kemen de Wettkämpers un Tokiekers tosamen. So lang as de Spelen anduern, kunn in Grekenland nüms Krieg anfangen. As Wettkämper wurrn blot fre'e Greken tolaten, as Tokieker jedereen, ok wenn he Utlänner weer. För teihn Maanden wurr traineert, darvan en Maand in Olympia sülvst. Wol ene Kampregel nich befolgen dee, de muss ene Geldstraaf betahlen. De Winner kreeg enen Ööltwieg. Dat weer de höchste Ehr, ok för de Familie. He druff siene Statue in Olympia upstellen laten, wuur tohuus festlich upnahmen un begrööt, bruuk foortan kiene Stüren mehr to betahlen un kunn up Staatskosten ümmer mit de Raatsherrn eten.

De wichtigsten Sportaarten weren Springen, Lopen, Ringkamp, Fuustkamp un Peerrennen. As swoorste Disziplin gult de Fiefkamp.

Enen Franzoos, den Baron van Coubertin, is dat to verdanken, dat disse Sportfestspelen siet 1896 wedder all veer Jahren stattfinnen doot, aver nich mehr in Olympia, sünnern jedet Maal in en anner Land van de ganze Welt.