Swatten Stinkkäver
| Swatten Stinkkäver | ||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
 | ||||||||||||||||||||
| Systematik | ||||||||||||||||||||
| ||||||||||||||||||||
| Wetenschoplich Naam | ||||||||||||||||||||
| Ocypus olens | ||||||||||||||||||||
| Müller, 1764 |
Bi den Swatten Stinkkäver (Ocypus olens) hannelt sik dat um en Käver ut de Familie vun de Kortflunkenkävers (Staphylinidae). He lett an un for sik na en swatten Ohrenknieper, vunwegen, datt he bloß man korte Deekflunken hett.
Kennteken
[ännern | Bornkood ännern]Mit en Längde vun 22 bit hen to 32 Millimeters sünd de Swatten Stinkkävers de gröttste Aart mank de Kortflunkenkävers in Middeleuropa. Dat ganze Lief is man swatt, mit swatte Haar doran. Dat föffte Segment vun dat Achterlief liggt free un hett an'n Achterrand up de Böversiet en fienen hellen Suum. An de Schenen (Tibia) vun de Vörbeen sitt buten an'n Rand Doorns an. De Kävers hefft vullstännige Huudflunken un könnt dor ok mit flegen.
Annere Aarden, de na de Stinkkävers slaht
[ännern | Bornkood ännern]En annere Aard, de na den Stinkkäver sleiht, is de Swatte Roofkäver (Ocypus nitens), un ok mit den Dunkeln Roofkäver (Ocypus tenebricosus) kann he dör'nanner smeten weern. Düsse Aarden sünd lüttjer un hefft ok keen Flunken.
Synonyme
[ännern | Bornkood ännern]Annere Naams for düssen Käver sünd:
- Ocypus fulvopilosus Fiori, 1894
- Goerius macrocephalus Stephens, 1832 (Homonym)
- Staphylinus major De Geer, 1774
- Ocypus meridionalis Fiori, 1894
- Staphylinus unicolor Herbst, 1784
Wo se vörkamen doot
[ännern | Bornkood ännern]De Kävers sünd wiethen in Europa antodrepen un hoolt sik in allerhand verscheden Levensruum up, man an'n leevsten in fuchtigen Woold un an den sien Rand, man ok in Goorns, up de Heid un towielen ok an dröge Afhäng. Dor leevt se unner doot Holt, Steen, in'e lose Eer un up de Wege.
Wie se leven doot
[ännern | Bornkood ännern]De Swatten Stinkkävers freet annere Deerter, as Mettjen, Rupen un de Budden vun annere Insekten. Wenn se in Gefohr kaamt, spreet se de groten Mandibeln ut'neen. Dor könnt se duchtig mit tobieten un ok minschliche Huud uprieten. Bovenhen stellt se dat Achterlief öber Kopp na vörn hen up un wüllt so Angriepers bange maken. Mit de witten Drüsen an't Enne vun't Achterlief könnt se en Sekret afgeven, dat sunnerlich stinken deit. Dor hefft se ok ehren Naam vun her. Vunwegen den Gestank sünd se al in't Middeloller mit den Düvel tohopenbrocht wurrn, so heet de Kävers up Engelsch Den Düvel sien Kutschpeerd-Käver. De Budden leevt nich veel anners, as de adulten Kävers un sünd ok Rövers.
Literatur
[ännern | Bornkood ännern]- Karl Wilhelm Harde, Frantisek Severa und Edwin Möhn: Der Kosmos Käferführer: Die mitteleuropäischen Käfer. Franckh-Kosmos Verlags-GmbH & Co KG, Stuttgart 2000, ISBN 3-440-06959-1.
- Georg Möller, Reiner Grube, Ekkehard Wachmann: Der Fauna Käferführer I – Käfer im und am Wald Fauna-Verlag, Nottuln 2006, ISBN 3-935980-25-6.
- Jiři Zahradnik, Irmgard Jung, Dieter Jung et al.: Käfer Mittel- und Nordwesteuropas, Parey Berlin 1985, ISBN 3-490-27118-1.
Weblenken
[ännern | Bornkood ännern]
Swatten Stinkkäver. Mehr Biller, Videos oder Audiodateien to’t Thema gifft dat bi Wikimedia Commons.