Kortflunkenkävers
| Kortflunken | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|
 | ||||||||||||||||||
| Systematik | ||||||||||||||||||
| ||||||||||||||||||
| Wetenschoplich Naam | ||||||||||||||||||
| Staphylinidae | ||||||||||||||||||
| Latreille, 1802 |
Bi de Kortflunkenkävers (Staphylinidae) hannelt sik dat um en Familie mank de Kävers (Coleoptera). Dor sünd bitherto bi 47.000 Aarden in um un bi 3.200 Geslechter vun beschreven. Dor is dat een vun de gröttsten Familien mank de Kävers mit. Allerhand Aarden sünd bit up düssen Dag overhoop noch nich beschreven wurrn. In Middeleuropa gifft dat bi 2.000 Aarden, dormank in Düütschland bi 1.554 Aarden.
Wie se utsehn doot[ännern | Bornkood ännern]
De meisten Kortflunkenkävers laat gor nich na Kävers. Dat kummt vunwegen ehre korten Deekflunken un ehr Achterlief, dat dor unnerut kieken deit. In’n groten un ganzen sünd de Kävers man lüttsch (2 bit 8 Millimeters), man dat gifft ok lüttjere (bi 0,5 mms) oder gröttere (bit hen to 40 oder 50 mms) Aarden. De stieven Vörflunken sünd bannig kort un laat den gröttern Deel (woll twee Drüddels) vun dat Achterlief free. Meist versteekt de Kävers sik un sünd nich to sehn. Ofschoonst se in en Butenskelett insitten doot, könnt se sik leifig rögen un kaamt in luerlüttje Löcker un allerhand versteken Göter rin, wo annere Deerter nich rinpasst. De meisten Aarden fleegt good un sünd in grode Gruppen unnerwegens, wenn dat in’e Schummertied an’n Avend schöön warm is. Ofschoonst de Deekflunken man kort sünd, is dat Paar Achterflunken meist groot. Dat besteiht ut Huud un mutt up vigeliensche Aart tosamenfoolt weern, dormit dat unner de Deekflunken passen deit. Dat Utfolen vun de Flunken geiht avers bannig fix.
Wie se leven doot[ännern | Bornkood ännern]
Veel lütte Aarden sünd over’n Dag unnerwegens, man de gröttern söökt ehr Freten normolerwiese bloß man in’e Nacht. Kortflunkenkävers sünd allerwegens togange, wo dat nich to dröge is. Faken un in allerhand Aarden un grote Tahl kaamt se vör in en fuchtig Umto, as an’n Suum vun allerhand Water, ok wenn dat kolt oder solten is. Dat gifft ok Aarden, de leevt deeper in’e Eer un hefft ehre Ogen torüchbillt un könnt ok nich mehr flegen. Gegen anner Aarden mank de Kävers över, hoolt sik de Kortflunkenkävers striktemang an’e Eer. Dat gifft nich een Aart, de in’t Water leven deit.
Wo se leven doot[ännern | Bornkood ännern]
Staphylinidae sünd up’e ganze Welt tohuse. De meisten Aarden finnt sik in de Tropen oder in de matig natten Gemarken up all Kontinenten, man ok in rugere Gegenden kaamt se vör. As een vun wenige Gruppen mank de Warvellosen leevt se ok in Wösten, in grote Hööchde up’e Bargen un dicht bi’n Noord- oder Süüdpol.
Kiek bi[ännern | Bornkood ännern]
- Swatten Stinkkäver (Ocypus olens)
- Swatten Roofkäver (Ocypus nitens)
