Maximilian I. (HRR)

Maximilian I. ut dat Huus Habsborg, (* 22. März 1459 in Wiener Neestadt; † 12. Januar 1519 in Wels, Böveröösterriek), weer vun 1477 af an Hertog vun Burgund, vun 1486 af an Röömsch-düütschen König, vun 1493 af an Erzhertog vun Öösterriek un vun 1508 af an Kaiser vun dat Hillige Röömsche Riek vun de Düütsche Natschoon. He warrt „de leste Ridder“ nömmt.

Leven

Maximilian is up de Borg in Wiener Neestadt as Söhn vun Kaiser Frederik III. un Eleonore Helena vun Portugal boren wurrn. Twuschen 1462 un 1463, dor weer he veer Johre oold, hett Maximilian mitkregen, wie sien Onkel Albrecht VI. un sien Vadder Kaiser Frederik III. sik in Wien in’e Plünnen harrn. De Wieners hefft dortieds de Porten open slaten for Albrecht, ofschoonst Frederik in de Stadt weer un Albrecht allerwegens vertellt harr, dat he dat up em afsehn harr. Se hefft Albrecht as neen Befehlhebber ankeken un menen, unner sien Regeern scholl jem dat sachs beter gahn. So hefft se, tohopen mit em, de Hoffborg belagert un de beiden Kanonen, de dat dormols in de Stadt geev, dor dagelang up afschaten. Maximilian hett dat de Wieners nie nich vergeven. Ofschoonst Wien de Hööftstadt vun sien Erzhertogdom weer, is he nich faken in de Stadt ween un hett sik lever in Wiener Neestadt upholen.

As Kind hett siene Mudder em de olen Vertellen un Sagen vun portugeesche Helden vertellt un hett em Danzen lehrt un Scheten mit Piel un Bagen. Sien Vadder harr dat lever sehn, he weer flietiger up’e School ween. As de Söhn acht Johre oold weer, is de Mudder sturven. Dortieds konn he veel beter mit Peerd un Sweert umgahn, as mit de Lehrböker. He bleev sien Leven lang en goden Strieder up de Turniere, man en slechten Latiener.

Vörgänger	Amt	Nafolger
Frederik III.	Röömsch-düütschen Kaiser 1508-1519	Karl V.

Weblenken

Maximilian I.. Mehr Biller, Videos oder Audiodateien to’t Thema gifft dat bi Wikimedia Commons.

Kaisers vun dat Hillige Röömsche Riek vun de Reformatschoon af an