Martina Oertzen

Martina Oertzen (2013)

Martina Oertzen (boren as Martina Jobmann; * 6. Mai 1964) is en düütsche Kommunaalpolitikerin von de CDU.

Oertzen is 1964 boren un in Ramßel opwussen. Siet 1990 leevt se in Ohlendörp. Se is lehrte Bankkoopfro un weer Prokuristin för Human Resources un Personalentwicklung (PE).

In de CDU is Oertzen 1995 rin. Siet 1996 is se Maat von’n Oortsraad von de Oortschop Ramßel/Ohlendörp/Holtörp von de Gemeen Seevdaal. Bet 2013 weer se ok Oortsbörgermeestersche för de Oortschop. Siet 2001 weer se tosätzlich Afornte in’n Kreisdag von’n Landkreis Horborg. Dor weer se Vörsitterin in’n Utschuss för School/Sport/Kultur un Maat in’n Bo- un Planungsutschuss. 2006 is se Maat von’n Verwaltungsraad von de Spoorkass Horborg-Buxthu worrn un hett dor in’n Kreditutschuss arbeidt. Siet 2006 is Oertzen ok Maat von’n Gemeenraad von de Gemeen Seevdaal. Dor weer se Maat in’n Verwaltungsutschuss (VA), in’n Boutschuss un in’n Ümwelt- un Planungsutschuss.

Bi de Wahl to’n ne’en Börgermeester von de Gemeen Seevdaal an’n 22. September 2013, de parallel to de Bundsdagswahl 2013 weer, hett Oertzen in’n eersten Wahlgang 12.583 Stimmen (48,5 %) kregen. Bi de Stichwahl an’n 6. Oktober 2013 twüschen ehr un Ulrich Sauck von de SPD hett Oertzen 59,7 % von de Stimmen kregen un Ulrich Sauck 40,3 %. An’n 9. Oktober 2013 hett se de Amtsgeschäften von ehren Vörgänger Günter Schwarz von de SPD övernahmen.