Manteldreger

Vun Wikipedia
Manteldreger;

Manteldrager; Börgermeester; Paster

Manteldreger
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Tüütvagels (Charadriiformes)
Familie: Möwen (Laridae)
Geslecht: Larus
Wetenschoplich Naam
Larus marinus
(Linnaeus, 1758)
Manteldreger an’n Strand.
Manteldreger fritt Steenlöper.
Ei von’n Manteldreger

De Manteldreger (Larus marinus), up Platt ok woll Börgermeester oder Paster nömmt, up Hoochdüütsch Mantelmöwe, is en Vagel ut de Familie vun de Möwen (Laridae). Tohuse is se an de Küsten in Noord- un Nordwesteuropa, in Gröönland un in’n Noordosten vun Noordamerika. An de düütsche Waterkant un an de Waddensee brott he nich. In Europa gifft dat den gröttsten Bestand in Norwegen, Grootbritannien, Iesland un Sweden. De Populatschonen hooch ut’n Norden treckt in’n Winter na Süden oder Westen hen, de meisten annern blievt, wo se sünd.

Wiethen hollt sik de Manteldreger an de Waterkant. Dor boot he siene Nester an Stäen, wo numms henkamen kann, as up Eilannen un Felsklippen. Dat kummt fökener vor, datt he in Kolonien vun annere Möwen bröden deit. Dor besett he denn de hööchsten Stäen, de an’n besten Oversicht hefft. Freten deit he sunnerlich Deerter un Affall. Faken grippt he sik annere Vagels oder jaagt jem de Büte af, faken fritt he avers ok Fisch un annere Deerter ut de See.

In’n Loop vun dat 20. Johrhunnert hett de Bestand vun den Manteldreger bannig tonahmen. Sunnerlich in Noordamerika is dat bannig fix gahn.

Kennteken[ännern | Bornkood ännern]

De Manteldregers sünd de gröttste Aart mank de Möwen. Se könnt 74 cm lang weern un ehre Flunken spannt se bit hen to 1,5 m ut. Utwussene Vagels dreegt en swatten Mantel. Jungvagels sünd eerst mol bruun spickt un kriegt den swatten Mantel eerst in dat drüdde Vörjohr an. De Snavel is geel mit en roden Placken. De Poten hefft de Klöör vun Fleesch.

Wie he leven deit[ännern | Bornkood ännern]

Gegen de meisten annern Möwen over sünd Manteldregers normolerwiese Roofdeerter un jaagt annere Vagels ehre Büte af. Man se folgt ok Buckelwale, Heringshaie un Swarms vun Blaufinnthunfische na, un profiteert dor denn vun, wenn düsse Deerter Seefische upjaagt, so, datt se na boven an de See kaamt. Manteldregers sünd dor bekannt for, datt se as Roofvagels in Seevagelkolonien Eier un Küken vun Seepapagoyen, Seekuten, Kobben, Swattkoppmöwen un annere Vagels freten doot. Se könnt ok grote Seepapagoyen, Kieren, Singvagels up’n Tog un lüttje Aanten angriepen, versupen un daalsluken, ohn dor vun aftobieten.[1]

Wie he sik vermehrt[ännern | Bornkood ännern]

Dat Nest is ut allerhand Plantendeele tohopenboot un utstaffeert mit Feddern un Gras. De Manteldregers leggt dree brune Eier mit dunkere Placken. Dor sitt se denn 23 bit 26 Dage up to bröden.

Literatur[ännern | Bornkood ännern]

Kiek ok bi[ännern | Bornkood ännern]

Weblenken[ännern | Bornkood ännern]

Manteldreger. Mehr Biller, Videos oder Audiodateien to’t Thema gifft dat bi Wikimedia Commons.
  1. Manchester Bird Watching Examiner