Makkum

Wapen/Flagg

Koort

Basisdaten

Provinz: Freesland

Gemeende: Wûnseradiel

Inwahners:

3.441 (Januar 2004)

0 m över de See

8754

0515

Koordinaten:53° 3′ N, 5° 24′ O53° 3′ N, 5° 24′ O

Grenzen bi OSM:

2658370

Makkum is vun ole Tieden her en Fischerdörp in de ehemaalsche Gemeende Wûnseradiel in de Provinz Freesland in de Nedderlannen. Dor leevt üm un bi 3450. Inwahners.

Historie

In dat Middelöller hett Makkum den Naam dragen: „Poort na de Zuiderzee“. Dat keem vunwegen de twee Slüsen, de to en Klooster hören döen, wat nich wiet weg weer. Makkum kunn so en Rull spelen as en wichtig Zentrum för den Hannel. Dat lä just an de richtige Steed.

Dat „Gollen Tietöller“ füng in Makkum in dat 17. Johrhunnert an un güng bit na dat 18. Johrhunnert. In de Tiet weer Makkum en wichtig Zentrum för Hannel un Bedrieven. Dor hören Pöttereen to, Tegelmakereen, Möhlen för Holt, Ööl, Papier un Peper, Scheepswarften un mehr as 100 Kalkovens. Dat dat Makkum in düsse Johren so goot güng, dat keem vör allens vun de Brennereen her, de Kalk ut Muschelschellen brennen döen. Dor harrn veel Lüde Arbeit vun. Düsse Kalk weer vun en hoge Qualität un is ünner annern bruukt wurrn, as de Hüser in Amsterdam boot wurrn sünd. Dat Grundmaterial un de Produkten, de dor an'n Enne vun maakt wurrn sünd, sünd mit Scheep hen- un herföhrt wurrn. Dor bleuhden ok de Scheepfohrt un de Schippbo üm. Ok wichtig weer dormols de Fischeree. Noch hüdigendags gifft dat dor ene lüttje Flott vun Fischerscheep. In dat 19. Johrhunnert güng dat mit Makkum bargdol. Dat keem dorvun, dat de Zuiderzee versannen dö. In düsse Johren sünd avers de Hannelsscheep jummer grötter wurrn un konnen nu nich mehr na den Haven inlopen. Handwark un Bedrieven güngen torüch un bloß Schippbo un Pöttereen sünd nableven. In dat 20. Johrhunnert güng dat denn avers doch wieder. Dat keem vunwegen de Anlaag vun den Afslussdiek un vun dat Makkumerdiep, dat utbaggert wurrn is, dormit de Scheep den Haven wedder anstüern könnt. In de verleden Johren hett besunners de Tourismus sik goot maakt in Makkum. Besunners de Lüde, de sik geern up'n Water rumdrieven doot, föhlt sik hier tohuse. Jedet Johr kaamt grode Massen vun Touristen na dat Ferienzentrum “De Holle Poarte”. Dor höört en Strand to, en Campingplatz, Ferienwahnungen un ok en Promenaad.

Wat een sik ankieken kann

In Makkum gifft dat noch allerhand Tügen vun sien Gollen Tiet. De Anlaag vun de lüttje Stadt stammt ut dat 17. Johrhunnert. Bi de Slüse gifft dat an de lüttjen Grachten smucke Koopmannshüser to sehn, mit prächtige Gevels un allerhand Hüsersmuck, de Indruck maken deit. De vörmalige Waag schall een sik ok mol ankieken. Besöken schall een ok de Pötteree „Koninklijke Tichelaar Makkum“. Dat is de öllste Pötteree in de ganzen Nedderlannen. Dor stellt se al siet 400 Johren dat Makkumer Pötterwark her, wat up de ganze Welt bekannt is. Ok Landweertschop un Natuur speelt in Makkum en grode Rull. Dor gifft dat langs de Küst vun dat Iesselmeer Landstreken, de beröhmt sünd vunwegen de velen Vagels un de grote Tall vun verscheden Planten. Up de Warft „De Vries“ in den Haven vun Makkum weert Luxus- Megajachten boot. An den Diek na den Aflsussdiek to liggt en ole reformeerte Kark up en Warft. Ümto is de Karkhoff vun dat Dörp. Een Ooltreformeerte Kark gifft dat ok.