Mairie Vesack

De Mairie Vesack weer in de Franzosentied (1811 bet 1813) een von de veer Mairien, in de de Kanton Vesack indeelt weer. De Seet weer in Vesack. Se harr 2450 Inwahners.

Historie

De Ümgegend von Vesack hett vör de Franzosentied to de Stadt Bremen, to’n Bezirk Schönebeck von dat Gericht Leessem-Schönebeck un to dat Amt Blomendal in dat Hartogdom Bremen höört. De beiden letzten Rebeden hebbt in dat Kurförstendom Hannover legen. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weren de hannöverschen Öörd, de later to de Mairie Vesack höört hebbt, in’n Kanton Blomendal von’n Distrikt Bremervöör, Departement von de Elv- un Wersermünnen. Bremen aver is toeerst noch egenstännig bleven. To’n 1. Januar 1811 hett sik dat denn ännert. Dat Kaiserriek Frankriek hett Bremen annekteert un ok dat Königriek Westfalen müss Rebeed direkt an dat Kaiserriek afgeven. De Mairie Vesack is nee billt worrn un weer nu een von de veer Mairien in’n Kanton Vesack, Distrikt Bremerleh, Departement von de Wersermünnen. De Mairie is ut’n breemschen Oort Vesack un de Mairien Aumund un Grohn ut’n westfäälschen Kanton Blomendal billt worrn. Blots den Oort Lobbendörp hett de ole Mairie Aumund an de ne’e Mairie Blomendal afgeven.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Kaiserriek Frankriek:

  Vesack (1534 Inwahners), Grohn (480), Aumund (324), Fähr (112)

Vondaag sünd düsse Öörd all Deel von de Stadt Bremen.