Mairie Steenkark

De Mairie Steenkark weer in de Franzosentied (1810 bet 1813) een von de veer Mairien, in de de Kanton Jörk indeelt weer. De Seet weer in Steenkark. Se harr 3322 Inwahners.

Historie

De Ümgegend von Steenkark hett vör de Franzosentied to dat Grevengericht Oolland in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Steenkark een von de söven Mairien in’n Kanton Steenkark von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Steenkark weer nu een von de veer Mairien in’n Kanton Jörk, Distrikt Stood, Departement von de Elvmünnen. De Mairie weer nu düüdlich grötter, dor sünd de Öörd in tohoopfaat worrn, de vörher in Westfalen to de veer Mairien Steenkark, Gauderhandviddel, Greundiek un Twielenfleet (all veer in’n Kanton Steenkark) höört harrn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Steenkark

• Kaiserriek Frankriek:

  Steenkark (854 Inwahners), Gauderhandviddel (724 Inwahners), Greundiek (1024 Inwahners), Twielenfleet (720 Inwahners)

Vondaag sünd düsse Öörd Deel von de Samtgemeen Lüh.