Mairie Brietel

De Mairie Brietel weer in de Franzosentied (1810 bet 1813) een von de fiev Mairien, in de de Kanton Bewick indeelt weer. De Seet weer in Brietel. Se harr 1434 Inwahners.

Historie

De Ümgegend von Brietel hett vör de Franzosentied to dat Amt Scharnbeek-Bütel un de Amtsvaagdie Bewick von dat Amt Winsen in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Brietel een von de twölv Mairien in’n Kanton Scharnbeek von’n Distrikt Lümborg, Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Brietel weer nu een von de fiev Mairien in’n Kanton Bewick, Distrikt Lümborg, Departement von de Nedderelv. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Brietel, Bütel, Lüürshusen un Dreckhorborg (all veer in’n Kanton Scharnbeek) höört harrn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Brietel, Bennerstää

• Kaiserriek Frankriek:

  Brietel (301 Inwahners), Bennerstää (11), Bütel (415), Lüürshusen (264), Dreckhorborg (192), Boorn (186), Sanknies (65)

Vondaag sünd düsse Öörd Deel von de Samtgemenen Scharnbeek un Elvmasch.