Möhlenbarger Lock

Vun Wikipedia
Blick na Süüdoosten över dat Möhlenbarger Lock
Ole Koort von 1938, as de Süderelv noch nich dicht weer

Dat Möhlenbarger Lock is en Bucht an de Nedderelv twüschen Cranz un Finkwarder (Deel von de Stadt Hamborg). Fröher weer dat de Münn von de Süderelv. Vör dat Möhlenbarger Lock doot de Eilannen Swiensand un Nesssand liggen.

En Deel von dat Möhlenbarger Lock is Deel von dat Naturschuulrebeed Möhlenbarger Lock/Nesssand.

Historie[ännern | Bornkood ännern]

Fröher weer Finkwarder en Eiland in de Elv. An de Westspitz von Finkwarder sünd Noorderelv un Süderelv wedder tohoopflaten. Dat Binnendelta von de Elv hett Ebb un Flood hatt un dat weer en groot Söötwater-Waddenrebeed.

Möhlenbarg weer en lütten Oort, de vondaag to Blanknees höört. De Naam Möhlenbarger Lock stünn toeerst för en Priel güntsied Möhlenbarg, de as Fohrwater twüschen Cranz un Blanknees bruukt worrn is.

Mit de dree Köhlbrandverdrääg, de twüschen 1868 un 1908 slaten worrn sünd, is de Köhlbrand so wied utboot worrn, dat de gröttste Deel von dat Water in de Süderelv över den Köhlbrand afflaten is un nich mehr över de ole Münn von de Süderelv.

In de Johren 1940 hett en Dochterünnernehmen von Blohm & Voss, de Hambörger Flegerbo, op Finkwarder en Wark boon laten, üm Flegerbööd to testen. Bi disse Arbeiden sünd de Övers liek maakt worrn un de Elv is utbaggert worrn. Mit dat Utbaggerte is deelwies dat Eiland Nesssand opspöölt worrn.

Na de Stormflood von 1962 is de ole Süderelv denn ganz afsperrt worrn. Dat Möhlenbarger Lock is denn jümmer mehr opslickt un verlannt un dor is de hüdige Bucht von worrn. De Ole Süderelv flütt nu as Water nich mehr un steiht still.

Ut de Hambörger Flegerbo is över de Johren toeerst Messerschmitt-Bölkow-Blohm, denn de DASA un toletzt EADS worrn. Dochterünnernehmen von EADS is Airbus. Nadem beslaten worrn is, dat Airbus in dat Wark in Finkwarder den Airbus A380 boon will, weer dat nödig, de Lannbahn von dat Airbus-Wark länger to maken, dat de A380 dor ok seker lannen un starten kann. De eenzige Mööglichkeit, de Lannbahn länger to maken, weer, de Süderelv un en Deel von dat Möhlenbarger Lock totoschüdden. Allens tohoop schullen so dat so 20 % (170 Hektar) von dat Rebeed ween. Dat hett dulle Protesten gegen dit Projekt geven, vonwegen den Schuul von de Natur. Dat is in de Johren 2001 bet 2003 aver liekers daan worrn.

Dat twete gröttere Ünnernehmen an’t Möhlenbarger Lock blangen Airbus is de Warft J. J. Sietas in Neefeld.


Koordinaten:53° 33′ N, 9° 48′ O