Linkwood

Linkwood
Brenneree Linkwood (Foto: Christopher Gillan)
Land	Schottland
Region	Speyside
Tyyp	Malt
Status	aktiv
Besitter	Diageo
Grünnt	1825
Grünner	Peter Brown
Waterborn	bi’n Millbuies Loch
Washstill(s)	3
Spiritstill(s)	3
Produkschoonsvolumen	2.500.000 l

Linkwood is en Whisky-Brenneree, de süüdlich vun Elgin, Schottland, op en ruchweg veer Hektar groot Stück Land liggt, dat as’n Park anleggt is. De opstaute Burn of Linkwood, en Tostroom vun’n Lossie, gifft Köhlwater för de Produkschoon.

Historie

De Destille is – so warrt dat vermodt – üm un bi 1825 vun Peter Brown grünnt. Sien Plaan weer, mit de Destille de Produktivität vun de Lännereeen vun de Seafield Estates grötter to maken, de vun em verwalt worrn sünd. Brown is 1869 doodbleven, twee Johren later hett sien Söhn William Brown (†1893) de Brenneree vullstännig nee opboet un de Anlagen vergröttert. Vun 1897 bit 1933 höör se to dat Ünnernehmen Linkwood-Glenlivet Distillery Co Ltd.. 1933 weer se denn vun de Scottish Malt Distillers Ltd. övernahmen.

Wiel den Tweeten Weltkrieg stünn de Bedrief still. 1962 is de Anlaag renoveert worrn. Dorbi weer de Brenneree ümboet und de Brennblasen weern uttuuscht. Dorbi is denn ok de egene Dampmaschien stillleggt worrn, un de Bedrief an’t elektrische Nett anslaten worrn. Dör den Neebo vun dat Brennhuus (Linkwood B) is de Destille 1971 mit veer Brennblasen vergröttert worrn. Twüschen 1985 un 1990 is de olle Brenneree (Linkwood A) dicht wesen. 1992 is de hele Brenneree an den Besitter United Distillers & Vintners verköfft worrn, un dormit an Diageo.

Linkwood B, wat 1971 boet weer.

De Destille kann ok besöcht warrn, man dorför mutt een vörher anropen. En Besökerzentrum gifft dat nich.

Produkschoon

Linkwood warrt to dat schottische Whiskyrebeet Speyside rekent. Na olle Stüerünnerlagen sünd af 1825 mit twee Brennblasen ruchweg 4.500 l in’t Johr produzeert worrn. As de Destille 1871 vergröttert weer, steeg de Produkschoon op 227.000 l in’t Johr. 1897 weer se noch mol vergröttert un künn dormit de Produkschoon in’t Johr meist verdubbeln. Woveel de Brenneree vundaag produzeert is nich publiek, man kann aver ruchweg vun en Produkschoonsvolumen vun över 2.000.000 l utgahn.

Blots 2 % vun den herstellten Whisky warrt as Single Malt op’n Markt bröcht. De gröttste Deel dorgegen warrt för Blended Whiskys verbruukt, so as Bell’s, White Horse, Dimple, Johnnie Walker oder Haig.

Kiek ok

• List vun de schottischen Brennereen

Literatur

• Daniel Lerner: Schottischer Whisky. Aktualiseerte Neeutgaav. h.f.ullmann (Tandem Verlag), Königswinter 2005, ISBN 3-8331-2215-3.

Weblenken

Linkwood. Mehr Biller, Videos oder Audiodateien to’t Thema gifft dat bi Wikimedia Commons.

• The Definitive Scotch Whisky Information Website (engelsch)
• Linkwood Distillery Profile op Malt Madness (engelsch)