Klaus Siebert

Vun Wikipedia
Zur Navigation springen Zur Suche springen
Klaus Siebert un Frank Ullrich

Klaus Siebert (* 29. April 1955 in Schlettau (Sassen); † 24. April 2016 in Altenberg (Erzgebirge)) weer en düütsch Biathlet un Biathlontrainer.

Siebert weer en vun de herutragend Biathleten gegen Enn' vun de 1970er Johren. Bi de Biathlon-Weltmeesterschapen 1979 in Ruhpolding wurr he Weltmeester över 20 Kilometer vör Alexander Iwanowitsch Tichonow un Sigleif Johansen. Mit de DDR-Staffel kunn he 1978 un 1979 den Weltmeestertitel haalen. 1980 in Lake Placid wunn he bi de Olympisch Spelen Sülver mit de Staffel, woför he mit den Vaderländsch Verdeenstorden in Bronze uttekent wurr.[1] 1979 wunn he den Gesamtweltcup in' Biathlon. In de Johren 1978 un 1980 kunn he achter Frank Ullrich jewiels den tweeten Platz in' Weltcup beleggen.

Nah sien aktiv Tiet wurr Siebert Trainer. So hett he as Utwahltrainer vun de Junioren in de DDR (1984–1990) ünner annern lang Tiet den ehmalgen Altenberger Sportler Ricco Groß betrüet, den he van 1988 bit 2002 parallel to anner Engagements as Privattrainer to Siet stunn. Van 1994 bit 1998 traineer he ünnern annern Katja Beer, Carsten Pump as ok Carsten Heymann an' Olympiastüttpunkt Altenberg. Ansluutend weer he bit 2002 Co-Trainer vun de düütsch Natschonalmannschap.

2002 bit 2005 weer Siebert Natschonaltrainer vun dat öösterrieksch Team, wo he swoopunktmäßig de Scheetutbillen vörandreev. In' Juli 2006 hett he en Verdrag över twee Johr mit den Chineeschen Biathlon-Verband afslooten, wo he Cheftrainer wurr. Dör sien Arbeit wurrn de Leistungen vun meest all chineesch Biathleten beständiger. Völ hemm sück düchtig verbeetert, vör allen in de Scheetleistungen. Sien Verdrag wurr 2008 aber nich verlängert, wiel dat Striedigkeiten över de Insätze vun de Athleten in' Asien-Cup geev.

Kört vör Anfang vun de Saison 2008/2009 geev Siebert bekannt, en Verdrag mit den Verband vun Wittrussland slooten to hemm. He kunn sien Arbeit aber wegen gesundheitlich Probleme eerst kört vör de eerste Weltcup-Statschoon in Östersund upnehmen. Dornah aber kunn Siebert de wittrussisch Biathleten all to bemarkenswerten internatschonalen Erfolgen in' Weltcup un bi de Olympisch Winterspelen 2010 führen. Darja Domratschawa führ he an de Tipp vun de Welt, wat sück in de Bronzemedaille in't Eenzel in Vancouver un den Olympiasiegen in Verfolgung, Eenzel un Massenstart in Sotschi wedderspeegeln dee.[2]

Nah de Saison 2013/14 hett Siebert ut gesundheitlichen Grünnen sien spoodriek Tosommenarbeit mit den wittrussischen Verband afslooten. Sien Posten dor övernehm aber nich, so as dat ankünnigt weer, de Öösterrieker Alfred Eder, sonnern Fjodar Swobada ut Wittrussland.[3][4] Wiedere Operatschonen sünd 2014 folgt. Vörövergahnd hett he noch as freeberoplich Trainer för den Skiverband Sassen in eerst Lien Nahwussathleten traineert. Wegen sien Krankheit muss he sück vun de Sport torüchtrecken un is an' 24. April 2016 in dat Öller vun 60 Johren storven.

Weblenken[ännern | Bornkood ännern]

Commons-logo.svg Klaus Siebert. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Neues Deutschland, 22. April 1980, S. 2
  2. Darya Domracheva: "Egal was ich mache, ich mache es für Klaus Siebert"
  3. Fyodor Svoboda replaces Klaus Siebert in Belarusian women’s team
  4. Старшым трэнерам жаночай зборнай Беларусі па біятлоне стаў Фёдар Свобада (wittrussisch)