Kerberos (Maand)

Vun Wikipedia
Wesseln na: Navigatschoon, Söök
De Bahnen vun veer Pluto-Maanden

Kerberos is en lütten Maand vun den Dwargplanet Pluto, de in’n Sommer 2011 op Biller vun’t Hubble-Teleskop opdeckt worrn is.

Opdecken[ännern | Bornkood ännern]

Dat Opdecken vun en veerten Maand vun Pluto is an’n 20. Juli 2011 vun de NASA bekannt maakt worrn. De lütte Maan is op Biller funnen worrn, de mit dat Weltruum-Teleskop Hubble maakt worrn sünd. Egentlich weern de Forschers dorbi op de Söök na en mööglichen Planetenring, as de ok bi annere Planeten bekannt is. Söcht hett dorna ein Grupp vun Astronomen ünner dat Seggen vun Mark R. Showalter. Mit en Grött vun afschätzte 13 bit 34 km is dat de lüttste Maand vun’n Pluto, de bit vundaag opdeckt weer. De eerste Opnahm, op de he sehn worrn is, weer an’n 28. Juni 2011 maakt, wietere Biller vun’n 3. Juli un vun 18. Juli hebbt em denn ok wiest. De Biller weern all 8 Minuuten lang belicht. Op en Opnahm ut dat Archiv vun Hubble, de an’n 15. Februar 2006 mit en annere Kamera maakt worrn is, künn de Maand nadräglich ok identifizeert warrn. Man op de meisten annern fröheren Biller kann de Maand nich sehn warrn, vun wegen dat de Belichtungsduer körter weer[1][2].

Siet 2. Juli 2013 hett de Maand sien offiziellen Naam na den Höllenhund ut de greekschen Mythologie, de op den Ingang to de Ünnerwelt oppassen deit. Den Vörslag harr Mark Showalter op de Grundlaag vun en Afstimmen in’t Internett inreicht. Vörher weer de Maand ünner sien vörlöpige Beteken S/2011 (134340) 1 bekannt, as se vun de Internatschonalen Astronoomschen Union (IAU) vergeven warrt. Inoffiziell weer ok de Projektbeteken P4 vun de NASA begäng.

De Maand hett schienbor en unregelmatige Form, as dat bi lüttere Maanden begäng is un hett en schätzte Albedo vun 0,04 bit 0,35. Sien Bahn liggt twüschen de annern lütten Pluto-Maanden Nix un Hydra mit en middleren Afstand to Pluto vun 59.000 ± 2000 km. De Bahndaten sünd noch nich nipp un nau bestimmbor, man eerste Daten wiest dorop hen, dat de Maand sik op en meist kreisrunne Bahn in de Äquatereven bewegt[2].

Borns[ännern | Bornkood ännern]

  1. NASA: NASA'S Hubble Discovers Another Moon Around Pluto
  2. 2,0 2,1 IAU Electronic Telegram No. 2769: NEW SATELLITE OF (134340) PLUTO: S/2011 (134340) 1

Weblenken[ännern | Bornkood ännern]