Kalkreese

Vun Wikipedia
Zur Navigation springen Zur Suche springen
Dat Slachtfeld Kalkreese. Vun'n Kiekut in 40 m Hööchde ut bekeken

Kalkreese is en Dorp bi Bramske in de Gemeen Bramske in Neddersassen. Unner Umstänn hett dor de bekannte Varusslacht in dat Johr 9 n. Chr. stattfunnen. Kann avers ok angahn, datt de grote Tahl vun röömsche Fundstücke un Overreste dor wat mit Caecina siene Slacht oder mit de Slacht an’n Angrivarierwall to doon hefft, de en poor Johre later ween sünd.

Geschicht[ännern | Bornkood ännern]

Nadem hier 1987 allerhand röömsche Münten funnen wurrn sünd, is 1989 beslaten wurrn, de Saak up den Grund to gahn. Dat duer nich lang un denn is rutkamen, datt in de Gemarken bi dat Dorp Römers un Germanen tohopenstott sünd. Sunnerlich de Reste vun en bi 400 m langen Wall hefft de Forschers in Gang holen. Vunwegen, datt allerhand Münten mit den Overstempel mit de Bookstaven VAR funnen wurrn sünd, is annahmen wurrn, datt de röömsche Stattholler un Upperbefehlhebber Varus hier mit dree Legionen in en Achterhollt lockt un toschannen maakt wurrn is.

In dat Johr 2000 is an de Stäe en Museum boot wurrn. Bovento gifft dat de Gelegenheit un een kann sik ankieken, wat dor utbuddelt warrt.

Teutoborger Woold oder Kalkreese[ännern | Bornkood ännern]

Tacitus schrifft bi hunnert Johre na de Varusslacht, se weer in den saltus teutoburgensis (Tüüteborger Woold) slahn wurrn. Hüdigendags is nich mehr rut to finnen, wat he mit düssen Woold meent hett. De Barge twuschen Ossenbrugge un Builefeld, de hüdigendags so nömmt weert, hefft düssen Naam Teutoburger Wald eerst kregen, as in dat 19. Johrhunnert de Natschonalismus in Düütschland upkamen is. Vördem harrn se Ramskenbrink, Osning un Lippsken Waule heten. In den Osning bi Deppelt steiht siet 1875 dat Hermannsdenkmol.

Dat de grote Slacht nich in'n Osning, man bi Kalkreese in dat Bramsker Land stattfunnen hett, is en Theorie, de noch nich allto oold is. Natüürlich sünd de Frömmenverkehrsverbänne un de Touristikindustrie in Neddersassen, Bramske un Ossenbrugge dorachter ran, datt dor numms an twiefeln schall. Amenne warrt mit Kalkreese sien Museum ok allerhand Geld verdeent.

Twiefel an Kalkreese[ännern | Bornkood ännern]

To de Forschers, de nich glöven doot, datt de Sporen un Fundstücke in Kalkreese wat mit Varus siene grote Slacht to doon hefft, höört unner annern de Historikers Rainer Wiegels un Peter Kehne, de Archäologe Stephan Berke, de Numismatiker un Ooldhistoriker Reinhard Wolters, de Ooldhistoriker Dieter Timpe un de Middeloller-Forscher Herwig Wolfram.

Peter Kehne meent, dat weern to minne Minschenknaken to finnen for so en grote Slacht. Ok, datt se dör’nanner mengelt weern mit Knaken vun Deerter un datt dor gor keen Knaken vun Froenslüde un Kinner to finnen weern, seeg dor nich na ut, as wenn Germanicus jem inkuhlt harr. Kehne meent, de Wall mit sien Spitzgraven na Süden to, dat weer en röömsch Bollwark. Bovenhen pass dat nich to so en grote Slacht, datt de Wall man bloß bi 400 m lang weer. Ok de Gegend, de bitherto as Slachtfeld ankeken warrt, is na siene Meenung for de Varusslacht nich groot noog.

Weblenken[ännern | Bornkood ännern]


Commons-logo.svg Kalkreese. Mehr Biller, Videos oder Audiodateien to’t Thema gifft dat bi Wikimedia Commons.