John Churchill, 1. Duke of Marlborough
John Churchill, 1. Duke of Marlborough, Först vun Mindelheim, KG, PC (* 26. Mai 1650 in Ashe, Devonshire; † 16. Juni 1722 in Cranbourn Lodge) weer engelschen Feldherr in’n Krieg um de Spaansche Kroon un de eerste Duke of Marlborough.
Leven[ännern | Bornkood ännern]
Sien Loop bi’t Militär fung as, as he 1667 in de Garde intreden is. Fiev Johre later is he to’n Captain maakt wurrn un na den Krieg gegen de Nedderlannen is he fudder kamen to’n Oberst. Dat Militärhandwark hett he lehrt bi den groten franzööschen Feldherrn, Turenne. 1677 free he Sarah Churchill, Duchess of Marlborough. De weer en gode Fründin vun de latere Königin Anne. Vun 1685 bit 1692 is he de drüdde Gouverneur vun de Hudson’s Bay Company ween. Mit König Willem III. hett he sik nich goot verstahn un so is he eerst hooch kamen, as Anne 1702 Königin wurrn weer. Se hett em to’n Upperbefehlhebber maakt for de Truppen in den Krieg um dat Spaansche Arv, de bit 1713 duer. As he 1702 Kaiserswerth belagern un innehmen dö, is he in den Stand vun en Hartog böört wurrn. 1704 hett he, tohopen mit Eugen vun Savoyen, in de Slacht vun Hochstädt (engl. „Battle of Blenheim“), 1706 bi Ramillies un 1709 bi Malplaquet de Franzosen slahn. Churchill gull vun dor af an as Redder un as Held vun dat Vaderland. To’n Dank hett Queen Anne em en groot Stück Land in Woodstock, nich wiet af vun Oxford schunken. Bovento geev se em ok noch de Middels, en Huus to boen, wat to sien Stand passen dö. So is Blenheim Palace tostanne kamen, en Monument vun Grootheit un Kraft, na den Plaan vun John Vanbrugh, England sien bedüdensten Barock-Architekten. As de Tories 1710 de Wahlen wunnen hefft, möss Churchill Bott geven un na Hannober gahn. Na de Wenn in de Politik vun 1714 hett he unner König Georg I. un de Whigs all siene Ämter torüch kregen. Churchill is 1722 in Cranbourne Lodge sturven. He is Vörweser vun den latern brittschen Premierminister un Dreeger vun den Literatur-Nobelpries, Winston Churchill, de ok en Biographie over em schreven hett.
Literatur[ännern | Bornkood ännern]
- Winston S. Churchill: Marlborough. 2 Bänne. Manesse Verlag, Zürich 1990, ISBN 3-7175-8160-0 (Manesse Bibliothek der Weltgeschichte).
- David Chandler: Marlborough as Military Commander. Da Capo Press, Cambridge MA 1997, ISBN 1-885119-30-5.
- J. R. Jones: Marlborough. Cambridge University Press, Cambridge 1993.
Weblenken[ännern | Bornkood ännern]
John Churchill, 1st Duke of Marlborough. Mehr Biller, Videos oder Audiodateien to’t Thema gifft dat bi Wikimedia Commons.