Ismail Omar Shabazz
Ismail Omar Shabazz (Geboortsnaam George Alexander Tucker; * 8. Dezember 1937 in Orange Walk; † 13. Juni 2014 in Belize-Stadt) weer en muslimschen un polietschen Aktivist ut Belize.
Leven
[ännern | Bornkood ännern]George Tucker is 1937 as Söhn von Violet Longworth Whyte († 1998) un Samuel Augustine Sr. († 1998) in Orange Walk (to de Tied Brietsch-Honduras, nu Belize) boren.[1] De Öllern hebbt sik knapp twee Johr na de Geboort trennt un Tucker is denn bi siene Grootöllern opwussen.[1] Na’n Dood von sien Grootvader 1946 is de Grootmoder von Orange Walk na Belize-Stadt tagen.[1] Von 1942 bet 1952 hett he anglikaansche Grundscholen besöcht, aver keen offiziellen Afsluss maakt.[1] In’n Oktober 1962 hett he an de National Technical School in Los Angeles (USA) en Afsluss as Mechaniker maakt.[1] He hett in Belize-Stadt von 1953 bet 1970 för’n Malaria Education Service arbeidt un sik dorbi hoogarbeidt von en eenfachen Arbeider to en Supervisor.[1] Na 1970 hett he as Chefmechaniker för dat Malaria Eradication Department von dat Belize City Hospital arbeidt.[1]
Charles X Eagan harr in de USA de Nation of Islam kennenlehrt un den Islam annahmen. 1961 is he ut de USA utwiest worrn un keem na Belize trügg. Dor hett he denn Warf för de Nation of Islam maakt un Tucker weer an’n 8. Dezember 1962 de eerste Person, de Eagan to’n Islam bröcht harr.[1] Tucker hett den en’en Naam Ismail Omar Shabazz annahmen. 1963 is he tohoop mit Eagan na More Tomorrow gahn. Von 1965 bet 1976 un von 1988 bet 2003 weer Shabazz Geschäftsleider von de Muslim Community School.[1]
Shabazz weer an’n 9. Februar 1969 Mitgrünner von de United Black Association for Development (UBAD) un is 1969 ok as Schatzmeester von de UBAD wählt worrn. Tosätzlich weer Shabazz Drucker, Rutgever un Redaktör för Amandala, wat dat UBAD-Bladd weer.[1] Bi Amandala is he bet 1972 bleven.[1]
In’n Februar 1970 hebbt Evan X Hyde un Shabazz in Amandala en Artikel mit’n Naam Games Old People Play hatt, in den se de Justiz von Brietsch-Honduras angriepen deen.[2] Dor sünd se an’n 5. März för fastnahmen worrn.[2] Se sünd as Opröhrers anklaagt, aver an’n 7. Juli 1970 freespraken worrn.[2] Dat Amt as Schatzmeester hett Shabazz in’n November 1972 afgeven, as de Imam von de Nation of Islam, Nuri Mohammed, em anbaden hett, Vulltied as Imam un Missionar för de Nation of Islam to arbeiden.
För de Coalition Nine (Koalitschoon von UBAD un NIP) weer he Kannedaat bi de Wahlen to’n Stadtraad von Belize-Stadt an’n 8. Dezember 1971, kunn sik aver nich dörsetten.[3]
Von 1980 bet 1986 hett Shabazz in Los Angeles leevt un is dor von 1980 bet 1985 an dat Hy-Lond Health Care Center as Berader för psychische Gesundheit utbillt worrn.[1] Blangenbi hett he in Los Angeles as Mechaniker arbeidt.[1] He weer in düsse Tied Grünner von de Gruppen von de Los Angeles Muslims of Belize (LAMBS) un Belize Rural Economic Development of Agriculture through Alliance (BREDAA).[1]
Shabazz weer dor ok an bedeligt, dat de Moslems in Belize 2008 de eerste Moschee kregen hebbt (dat hett al siet de Johren 1960 an verscheden Steden in Belize-Stadt Gebeedsplätz geven, de aver jümmer in Privaatgebüüd ünnerbröcht weren).[4]
An’n 27. September 2003 is Shabazz as Justice of the Peace beropen worrn.[1]
Shabazz is an’n 13. Juni 2014 in dat Huus von siene Dochter in Belize-Stadt doodbleven.[5]
Shabazz harr veer Kinner.[1]
Footnoten
[ännern | Bornkood ännern]- ↑ a b c d e f g h i j k l m n o p Abdulmajeed Nunez: History of the Muslims in Belize. AuthorHouse, 2010, Sied 229
- ↑ a b c Lawrence Vernon: A History of Political Parties in Belize 1950–1981.
- ↑ Myrtle Palacio: Belize City Council Election Results 1962 to 2003
- ↑ Muslims Open House of Prayer, 7 News Belize an’n 16. Mai 2008
- ↑ Legendary activist, Ismail Omar Shabazz, passes at 76, Amandala an’n 13. Juni 2014
