Iemeckenlöwe

Vun Wikipedia

Iemeckenlöwen, ok Miegeemlöwen oder Mieghamellöwen, weert in Düütschland de Budden vun de Iemeckenjumfern (Myrmeleontidae) nömmt. Dor hannelt sik dat um en Familie vun de Insekten bi. Se höört to de Ornen vun de Nettflunken mit to. Mank de Nettflunken sünd de Iemeckenjumfern de Grupp mit de meisten Aarden, de sik ok an’n meisten utbreedt hett. Dor hefft de Iemeckenjumfern sik in de Evolutschoon good mit dörsetten konnt, wat sunnerlich an ehre Budden liggen deit. En groten Deel vun de Aarden (de ehre Budden all as Rövers leevt) hett Sandland besiedelt un dor Ökoloogsche Nischen mit funnen, de vördem vun annere Aarden nich bruukt wurrn weern. Besunners wiet anpasst hefft sik de Aarden, de ehre Büte in Trechters in’n losen Sand fangt. Düsse Trechters buddelt se sülms ut. Al lang, ehrder dat en Twieg vun de Zoologie mit Naam Entomologie geev, weern düsse Budden bekannt. Dor is al in Mythen un Legennen vun vertellt wurrn un jummers wedder sünd Forschers bigahn un hefft de Saak unnersocht. In allerhand Spraken steiht dat dore Woort for „Iemeckenlöwe“ nich bloß for de Budden, man ok for de adulten Formen vun dat Insekt (de Iemeckenjumfern). In’t Johr 2010 is de Iemeckenlöwe to’t Insekt vun dat Johr wählt wurrn.[1]

Fangtrechter mit Överreste vun en Iemecken

Iemeckenlöwen sünd avers nich de eenzigsten Insekten, de ehre Büte mit Trechters fangt. Ok de Budden vun de Wormlöwen (Vermileonidae), de to de Tweeflunken tohören doot, un de na Wörmer laten doot, boot Trechterfallen up drögen Sand.

Wat se freten doot[ännern | Bornkood ännern]

Anners, as de Naam seggen deit, freet de Iemeckenlöwen nich bloß Iemecken. Liekers maakt de den gröttsten Deel vun ehr Freten ut, wenn de Iemeckenlöwe nich wiet af vun en Iemeckenbo leven deit. Allgemeen vertehrt se avers allerhand Aarden vun Liddfööt. Neven Insekten ut allerhand Ornens tellt Kellerswiene, Spinnen, Mieten un Dusendfööt to ehre Büte, to’n Deel ok lüttje Naaktsniggen un Mettjen. Grenzen weert sett

  • dor de Büte ehre Grötte. To grote Deerter könnt ut den Trechter rutkamen oder sik bannig verdeffenderen. Denn büxt de Iemeckenlöwe meist ut. To lüttje Büte könnt se nich richtig griepen.
  • wenn de Büte nich passen deit. Bi Deerter mit en dannigen Panzer as bi Blattkävers könnt de Iemeckenlöwen ehre Tangen nich bieten. Ok de Hüser vun Sniggen könnt se nich knacken. Towielen hefft se ok Last mit de Hüllen vun Kellerswiene.
  • dode Büte: Wenn de Deerter, de in den Trechter fallt, sik rein gor nich rögen doot, weert se ut’n Trechter gooit, as hören se dor nich hen.
  • wenn de Büte dannig un stark is. Meist hefft de Iemeckenlöwen dor keen Last mit, wenn de Büte siik nich griepen laten will, man hen un wenn is ok al vertellt wurrn, datt gröttere Iemecken gegen en Iemeckenlöwen gegenan konnen un sogor, datt se em in ehr Nest brocht hefft.

Literatur[ännern | Bornkood ännern]

  • Johannes Gepp, Herbert Hölzel: Ameisenlöwen und Ameisenjungfern – Myrmeleonidae. Neue Brehm-Bücherei. Bd 589. Westarp-Wiss., Meideborg 1989, ISBN 3-89432-322-1
  • Mervyn W. Mansell: Evolution and success of antlions (Neuropterida: Neuroptera, Myrmeleontidae). In: Stapfia. Linz 60.1999, 49–58.
  • R. B. Miller, L. A. Stange: Description of the antlion larva Navasoleon boliviana Banks with biological notes (Neuroptera; Myrmeleontidae). In: Neuroptera International. Nice 3. 1985,119–126.
  • M. W. Mansell: The pitfall trap of the Australian ant-lion Callistoleon illustris (Gerstaecker) (Neuroptera: Myrmeleontidae): an evolutionary advance. In: Australian Journal of Zoology. Collingwood 36.1988, 351–356.
  • D. K. McE. Kevan: Antlion ante Linné: Μυρμηκολεων to Myrmeleon (Insecta: Neuroptera: Myrmeleonidae). In: Current Research in Neuropterology. Proceedings of the Fourth International Symposium on Neuropterology. Bagnères-de-Luchon Fra 1991. eds. M. Canard, H. Aspöck, and M. W. Mansell. SACCO, Toulouse Fra 1992, 203–232, ISBN 2-9506536-0-X

Belege[ännern | Bornkood ännern]

  1. Artikel bi www.nabu.de

Weblenken[ännern | Bornkood ännern]

Iemeckenlöwe. Mehr Biller, Videos oder Audiodateien to’t Thema gifft dat bi Wikimedia Commons.