Hugo Schultz
Hugo Schultz (* 1835; † 26. März 1905 in Potsdam) weer en prüüßschen Verwaltungsbeamten.
Schultz is 1835 boren.[1] He hett an de Universität Gießen Juristeree studeert un dor 1857 sien Dokter maakt.[1] 1858 is he Regerungsreferendar bi’n Regerungsbezirk Königsbarg worrn un 1861 Regerungsassesser bi’n Regerungsbezirk Gumbinnen.[1] To’n 1. Januar 1862 is he as Nafolger von Friedrich Wilhelm Theodor Dieckmann kommissarsch Landraad von’n Landkreis Memel worrn.[1] An’n 2. März 1864 is he denn richtigen Landraad worrn un hett dat Amt bet Februar 1868 behollen, as Schultz kommissarsch Landraad von’n Landkreis Posen worrn is.[1] Na em hett kommissarsch de Beamte von Röder dat Amt as Landraad övernahmen. In Posen is Schultz aber blots een Johr bleven.
Bi de Wahl 1867 to dat Prüüßsche Aforntenhuus weer he blangen Richard Freiherr Kunisch von Richthofen een von de twee Afornten, de in’n Wahlkreis Königsbarg 1 (Memel-Heydekrug) wählt worrn sünd. Bi de Wahl 1870 weer he nich wedder Kannedaat.
Schultz weer von 1869 bet 1875 Kreishauptmann von’n Stüürkreis Leh un Amtshauptmann von dat Amt Leh.[1] In dat Johr 1875 is he denn Polizeipräsident von dat Polizeipräsidium Danzig worrn.[1] 1882 is he as Landdrost in de Landdrostie Hilmssen wesselt un dor Nafolger von Adolf von Pilgrim ween.[1] As de Landdrostien in de Provinz Hannover to’n 1. April 1885 in Regerungsbezirke ümwannelt worrn sünd, is Schultz de eerste Regerungspräsident von’n ne’en Regerungsbezirk Hilmssen worrn. Dat is he bet 1899 bleven, as Ernst von Philipsborn em aflööst hett. Schultz is denn in Rohstand gahn.
He weer toletzt Würklichen Gehemen Böverregerungsraad.[1]
He hett 1868 in Schwarzort Maria Stantien freet.