Kreishauptmann

En Kreishauptmann is de Baas von en Verwaltungsrebeed, dat Kreis oder Kreishauptmannschop nöömt worrn is.

Hillig Röömsch Riek von düütsche Natschoon

In dat Hillige Röömsche Riek von düütsche Natschoon weren Riekskreise inricht. De Kreishauptlüüd weren wichtige Leidslüüd von de Riekskreise.

Öösterriek

Öösterriek ob der Enns

Dat Arzhartogdom Öösterriek ob der Enns weer in veer Veerdels indeelt, de ok Kreise nöömt worrn sünd: Innkreis, Hausruckkreis, Traunkreis un Mühlkreis. 1816 is dor noch de Salzburgkreis tokamen. Dat Leid över de Kreise harrn Kreishauptlüüd.

Kroonland Galizien

Dat Kroonland Galizien is 1772 an Öösterriek fullen un in Kreise indeelt worrn. De Kreishauptmann harr dat Leid över en Kreis. Von 1849 af an hebbt de Landsregerungspräsidenten de Kreishauptlüüd aflööst.

Sassen

Königriek Sassen

De Kreishauptmannschoppen in dat Königriek Sassen sünd mit de Verwaltungsreform von 1873/1874 to’n 1. Januar 1874 inricht worrn. Ut de Kreishauptmannschoppen sünd mit de Drüdde Verordnung över den Neeopbo von dat Riek von’n 28. November 1938 to’n 1. Januar 1939 Regerungsbezirke worrn un de Kreishauptlüüd hebbt denn Regerungspräsident heten.

Kurförstendom Sassen

Vörher hett dat aver ok al in dat Kurförstendom Sassen Kreise geven (Verwaltungsrebeden von Kursassen), över de von dat 17. bet 19. Johrhunnert Kreishauptlüüd dat Leid harrn.

Generalguvernement

Nadem dat Düütsche Riek 1939 Polen överfullen un innahmen hett, is dat Generalguvernement inricht worrn. Dat Generalguvernement is in Stadtkreise un Kreishauptmannschoppen indeelt worrn. Baaslüüd von de Kreishauptmannschoppen weren de Kreishauptlüüd.

Prüßen

Hannover

Nadem dat Königriek Hannover 1867 von Prüßen annekteert worrn is, is ut dat Königriek de Provinz Hannover worrn un Prüßen hett Stüürkreise inricht. Mit de Verwaltungsreform in Hannover to’n 1. April 1885 sünd ut Stüürkreise un Ämter Kreise worrn, över de denn Landrääd dat Leid harrn.