Hinrich Schult
Hinrich Schult (latiniseert ok Henricus Praetorius; * 1584 in Eestbrügg; † 25. Januar 1644 in Oterndörp) weer en düütschen Pädagoog.
Schult is 1584 as Söhn von Maria un den Pastoor Hermann Schult in Eestbrügg boren.[1][2] He hett toeerst Huusünnerricht von sien Vader kregen un is later ünner de Rekters Casmann un Schlüter op dat Athenaeum in Stood ween.[1] Na de Tied in Stood is he na dat Johanneum in Hamborg gahn (ünner Magister Sperling).[1]
He is Privaatlehrer ween un hett na en poor Johren noch wedder en Studium von de Theologie un orientaalsche Spraken an de Universität Wittenbarg anfungen.[1] Veerunhalv Johren is he in Wittenbarg ween.[1]
He weer von 1615 bet 1642 Rekter von de Latienschool Oterndörp.[1] Schult is an’n 25. Januar 1644 in Oterndörp doodbleven un dor an’n 30. Januar begraven worrn.[2]
