Hermann Bahlburg

Vun Wikipedia
Zur Navigation springen Zur Suche springen

Hermann Bahlburg (* 21. Juli 1892 in Jesborg; † 19. Februar 1962 in Bookholt) weer en Missionar von de Harmsbörger Mission un en plattdüütschen Schriever.

Bahlburg is 1892 as Söhn von Catharina, borene Vick, un den Timmermann Heinrich Bahlburg in Jesborg boren. He weer dor op de Volksschool, hett eerst Smidd lehrt un is denn op Wannerschop gahn un ünner annern na Stood un Seborg kamen. 1911 is he an dat Missionsseminar in Harmsborg gahn. As 1914 de Eersten Weltkrieg loosgüng, hett Bahlburg sien Studien afbraken un is op’n Hoff von de Öllern gahn, üm dor to helpen, nadem de öllere Broder as Soldaat intagen worrn is. Bahlburg hett denn en Krankenpleger-Lehr in Dresden anfungen, is aver as Soldaat in en Regiment in Sassen intagen worrn un weer denn bet an dat Enn von’n Krieg Soldaat. Dat Missionsstudium hett he 1921 afslaten un hett denn as Missionar för de Missionsanstalt Harmsborg arbeidt. Bahlburg is 1921 na Thälsdörp tagen un hett dor as Volksmissionar arbeidt un dorbi ok op dat Bruken von de plattdüütsche Spraak sett. In dat Johr hett he Minna Behrens freet, mit de he negen Kinner kriegen schull. 1927 güng he as Baas von en Grupp Missionars na den Westen von Äthiopien, üm ünner de Galla (vondaag Oromo nöömt) to missioneren. De Grünner von de Harmsbörger Mission, Ludwig Harms, harr al 1853 un 1857 Missionars na de Oromo schickt, de dor aver nich veel utrichten kunnen. Bahlburg harr den Wunsch, disse Mission wedder optonehmen, nadem 1926 kloor worrn is, dat de Harmsbörger Mission ehr Arbeid in Indien, de dör den Eersten Weltkrieg ünnerbraken weer, nich mehr wedder opnehmen kunn.

In Addis Abeba ankamen, hebbt se en Grundstück in Aira pacht. Dor hett Dietrich Waßmann en Missionsstatschoon opboot. Bahlburg sülvs is in Addis Abeba bleven. Dor hebbt se en Gemeen opboot, ut de vondaag de Evangeelsche Gemeen von Düütsche Spraak in Äthiopien mit de Krüüzkark Addis Abeba worrn is. 1931 keem Bahlburg na Düütschland trügg un hett 1932 siene Familie mit na Äthiopien bröcht. Siet de Tied von’n Italieensch-Äthioopschen Krieg 1935/1936, dör den Äthiopien to de Kolonie Italieensch-Oostafrika worrn is, harrn de Missionars dat besünners swoor un kunnen man kuum noch arbeiden.

In’n Tweten Weltkrieg hebbt de Briten Äthiopien innahmen un Bahlburg jüst as all de Italieners un Düütschen dor 1941 interneert. 1948 keem Bahlburg ut de Interneerung na Düütschland trügg un is Missionar binnen Düütschland worrn. Nadem he in Kunflikt mit de Leidslüüd von de Harmsbörger Mission keem, hett he as Missionar ophöört. Von 1950 af an hett he in Handörp leevt un dor as Schriever un plattdüütschen Spraakforscher arbeidt.

He hett von Januar 1951 bet Mai 1955 dat Pladdüüdsch’ Häimaodbladd rutbröcht un denn von Juni 1956 bet November 1961 de Norddüüdsche Häimaod.

Warken[ännern | Bornkood ännern]

  • Äijßder pladd-düüdscher Spraokfoihrer ganz hindyörr uuhs Mudderspraock fö’ Läivhämmer un Schoulkinner vun Pladd, aok fö’ Hoogdüüdsche un Flüchdlinge in’d Pladd kodd un goud in äinfacker Leährwiehs. Sülvsverlag, Harmsborg/Mundschenk, Soltau [1949]

Weblenken[ännern | Bornkood ännern]