Harvest Caye

Harvest Caye is en knapp 30 Hektar groot Privaateiland von de Norwegian Cruise Line in’n Distrikt Toledo von Belize. Dat Caye liggt in de Karibische See söss Kilometer in’n Süden von de Öörd Independence un Placencia un knapp een Kilometer vör de Küst. Dat liggt in dat Rebeed von dat Belize Barrier Reef.

Dat Eiland is exklusiv för Krüüzfohrtgäst von Norwegian Cruise Line dor un hett ünner annern en Baadstrand, en 1400 m² groten Pool, Gastronomie, Geschäften un en Botterlickerhuus mit Botterlickers von de Oort Morpho menelaus. Op dat Eiland steiht en 40 m hogen Lüchttoorn, de aver keen echten Lüchttoorn is, man as Utgangspunkt för verscheden Ziplines deent.

De Krüüzfohrtscheep köönt direkt an en Steg in’n Süden von dat Eiland anleggen, de 365 Meter lang is. De Insatz von Tenderbööd is nich nödig. Dat Eiland is eerst in de Johren 2010 för Touristen herricht worrn un hett in’n November 2016 apenmaakt. Dat eerste Schipp, dat dor anleggt hett, weer an’n 16. November 2016 de Norwegian Dawn.