Freddie Gruber

Freddie Gruber (* 27. Mai 1927 in de Bronx, New York City; † 11. Oktober 2011 in Los Angeles) weer en US-amerikaansch Jazz-Slagtüüchspeler un Musikpädagoog.

Leven un Wark

De Vader vun Gruber weer Ballsaaldanzer. Nah Studienjohren ünner annern bi Henry Adler (1941/42) hett he mit Morey Feld, Mickey Scrima un Cozy Cole arbeit. Af 1943 weer he as professionell Musiker tätig, so harr he in de 1940er Johren en Trio mit Ram Ramirez, dat in dat New Yorker Greenwich Village uptreden is, buterdem speel he mit Benny Ventura. In en Metronome-Artikel (The Shape of Jazz to Come) hett Barry Ulanov sien polyrhythmisch Konzept hervörhaben. Gruber weer en Leven lang mit Buddy Rich Früend, mit de he tietwies ok tosommen wahnt hett. Enn’ vun de 1940er Johren speel he mit Tony Scott, Jackie Paris, Rudy Vallee, in dat Three Deuces mit Harry „The Hipster“ Gibson, Dave Schildkraut, Tony Fruscella un Buddy DeFranco. He hörr ok to de Gene-Roland-Probenband un speel dor mit so bekannt Musikers as Charlie Parker, Al Cohn/Zoot Sims, Red Rodney un Anfang vun de 1950er Johren mit Oscar Pettiford.

1955 truck he nah Kalifornien, hett kört in Las Vegas arbeit un wark in de tweet Hälft vun de 1950er Johren in Los Angeles an Sessions mit Scott LaFaro, Gary Peacock, Charlie Haden, Hampton Hawes, Dexter Gordon, Bobby Hutcherson, Walter Norris un Dave Pike mit; Midden vun de 1960er Johren speel he mit Art Pepper. In disse Tiet fung he an, mehr to ünnerrichten, eerst in Clubs un in Terry Gibbs sien Musikgeschäft (1965–67), denn in sien eegen Huus. To sien Schölers hebbt ünner annern John Guerin un Don Ellis hörrt, later Neil Peart, Vinnie Colaiuta, Steve Smith, Dave Weckl, Peter Erskine, Adam Nussbaum, Anton Fig, Jim Keltner oder Mitch Mitchell. Buterdem hull he regelmaatig Workshops un Kurse in Europa.

De Slagtüüchspeler Elvin Jones tell Gruber to sien Hööftinflooten.

Diskographisch Henwiesen

• Gene Roland Band: The Band That Never Was (Spotlite, 1948)

Borns/Weblenken

• Freddie Gruber bi Drummerworld
• Feature över Freddie Gruber in JazzTimes
• Porträt bi Yamaha.com

Lexikalisch Indrag

• Leonard Feather, Ira Gitler: The Biographical Encyclopedia of Jazz. Oxford University Press, Oxford usw. 1999, ISBN 978-0-19-532000-8.