Frank Wild
John Robert Francis „Frank“ Wild (* 10. April 1873 in Skelton, Yorkshire; † 19. August 1939 in Klerksdorp, Süüdafrika) weer en britisch Polarforscher. He nehm af 1901, afsehn vun de Terra-Nova-Expeditschoon, an all britisch Antarktisexpeditschonen vun dat so nömmt Golden Tietöller vun de Antarktis-Forschung deel.
Van 1901 bit 1904 weer Wild Expeditschonsliddmaat vun de Discovery-Expeditschoon ünner de Leitung vun Robert Falcon Scott. Hier hett he ok sien langjohrigen Früend Ernest Shackleton kennen lehrt.
Wild hett Shackleton van 1907 bit 1909 up de Nimrod-Expeditschoon begleit. Tosommen mit Shackleton, Jameson Boyd Adams un Eric Stewart Marshall reck he an’ 9. Januar 1909 88° 23′ N, 162° 0′ O un dormit de gröttste bit dorhen reckt Nahkommen an en vun de beid geographisch Eerdpole.
Van 1911 bit 1914 hörr he to de Mannschap vun de Aurora-Expeditschoon ünner de Leitung vun Douglas Mawson. Hier ünnerstunn hüm dat up dat Shackleton-Schelfies erricht Basislager.
Van 1914 bit 1916 nehm he an Shackleton sien Endurance-Expeditschoon deel. As Shackleton tosommen mit fiev wiederen Expeditschoonsdeelnehmer up de avendüerlich Reis mit de James Caird nah Süüdgeorgien upbraken is, um Hülp to halen, wurr Wild to’n Kommandanten vun de Torüchbleeven up Elephant Island.
Ansluutend deen Wild tosommen mit Shackleton in’ Eersten Weltkrieg in Russland. Dornah bedreev he gemeensam mit Francis Howard Bickerton (1889–1954, siet de Mawson-Expeditschoon good Früend mit Wild) und James McIllroy (1879–1968, Dokter bi de Endurance-Expeditschoon) en Boomwullfarm an den Malawisee. Dor is he an Malaria krank wurrn.
Van 1921 bit 1922 weer he ok Liddmaat vun de Quest-Expeditschoon, to deren Baas he wurr, nahdem Ernest Shackleton 1922 an en Hartinfarkt in Grytviken up Süüdgeorgien storven weer.
Wild is in groot Armoot storven, nahdem he sück in de Tüschentiet as Lagerist in en süüdafrikaansch Diamantenmien un toletzt as Barkeeper en rünnerkommen Wertschap dörslahn harr, wohrschienlich an de Folgen vun sien Alkoholkrankheit. De Versöök vun eenig Liddmaaten vun de Endurance-Expeditschoon, hüm to helpen, keem to laat. Anner Borns snacken aber vun en Lungenentzündung as Doodsoorsaak.
De Fru vun Wild weer de Ansicht, dat dat de Wunsch vun hör Mann ween weer, neben Shackleton beerdigt to wurrn. Sien Asch wurr dorüm nie bisett. Eerst över 60 Johr later wurrn sien starvlich Överresten in Süüdafrika upspürt. In’ November 2011 wurr sien Asch nah Süüdgeorgien brocht un nah en Goddesdeenst in Anwesenheit vun tallriek Nahfohren vun Wild und Shackleton bisett, direkt neben dat Graff vun Shackleton.[1][2]
Familie[ännern | Bornkood ännern]
De jüngere Bröer vun Frank Wild, Ernest weer wiels de Endurance-Expeditschoon Liddmaat vun de ünnerstütten Ross Sea Party.