Eric Stewart Marshall

Eric Marshall, 1908

Eric Stewart Marshall, CBE (* 29. Mai 1879 in Hampstead; † 26. Februar 1963 up de Isle of Wight) weer en britisch Dokter un Polarforscher. Bekannt is he dör de Deelnahm an de Nimrod-Expeditschoon (1907-1909).

Leven

Utbillen

Marshall studeer eerst Theologie an dat "Emmanuel College" vun de University of Cambridge bevör he 1899 an dat "St. Bartholomew’s Hospital Medical College" in London gung un dor 1906 sien Dokter as Chirurg maken dee. He kreeg dat Licentiate of the Royal College of Physicians (LRCP) un dat Membership of the Royal College of Surgeons (MRCS). Marshall weer todem en bannig gooden Sportler. In Cambridge hör he to de Rudermannschap un in London weer he en spoodriek Rugbyspeler.

Nimrod-Expeditschoon

Marshall wurr vun Ernest Shackleton för de sien eerst eegen Südpolexpeditschoon as Schippsdokter un Kartograf up de Nimrod anhüert. Nah dat Anlannen an dat Cape Royds an‘ 3. Februar 1908 hett he de ampart eerst Filmupnahmen maakt, de in de Antarktis dreiht wurrn. In‘ März 1908 nehm he an de spoodriek Eerstbestiegen vun den Mount Erebus deel. Todem hörr he to de veerköppig Mannschap, de an‘ 29. Oktober 1908 to’n Süüdpool upbreeken de, aber wegen slecht Rüsttüüg, to wenig Proviant un swunnen Kräfte vör de Tiet umkehren muss. Up den Trüggweg is Marshall kört vör dat Teel mit Magenkrammen tosommenbraken un wurr eerst dör den Insatz vun sien Kameraden rett. Hüm to Ehren hett Shackleton en Bargkett vun de Queen Alexandra Range bi den Beardmore-Gletscher nah hüm nömmt (Marshall Mountains, 84° 40′ S, 165° 20′ O). Todem wurr en Iesstroom, de in den Beardmore-Gletscher inmünnen dee, dör Shackleton nah de Moder vun Marshall Alice Glacier nömmt. För sien Verdeensten wurr Marshall mit de sülvern Polarmedaille vun de Royal Geographical Society uttekent.

Tiet nah de Nimrod-Expeditschoon

Nah sien Trüggkehr nah England nehm Marshall van 1909 bit 1911 as medizinisch Offizier an en britisch Expeditschoon nah Neeguinea deel. In‘ Eersten Weltkrieg weer he in‘ Rang vun en Captain Deputy Assistant Director of Medical Services (DADMS) in dat Royal Army Medical Corps (RAMC) un wurr mit den 1914 Star, den Military Cross un de Victory Medal uttekent. Todem kreeg he för de Deelnahm an de antibolschewistisch Interventschoon vun de Entente in‘ Russischen Börgerkrieg 1918 den Sankt-Stanislaus-Oorden. Later bedreev he en Farm in Kenia, bevör he sück up de Isle of Wight to Ruh setten dee.

Borns

• Riffenburgh, Beau (2005). Nimrod: the Extraordinary Story of Shackleton's First Expedition. Bloomsbury Publishing PLC, London. ISBN 0747572534.
• Bertrand, Kenneth J. und Alberts, Fred G. (1956). Geographic Names of Antartica. U.S. Govt. Print. Off., Washington.
• Informatschonen up de Websteed vun de ames-Caird-Society
• Informatschonen auf coolantarctica.com

Weblenken

• Personennaamdatei