Forestocracy

Vun Wikipedia
Zur Navigation springen Zur Suche springen

Forestocracy (tohoopsett ut engelsch forest Holt un engelsch -cracy -kratie) is en Begreep, de bruukt warrt, üm de fröhere Sellschop in dat hüdige Belize (fröher Brietsch-Honduras) to beschrieven. De Begreep betekent, dat de Herrschop in dat Rebeed von en lüttje Grupp von Minschen utgüng, de in’n Holthannel aktiv weren.

Historie[ännern | Bornkood ännern]

In dat 17. Johrhunnert hett Spanien dat Rebeed an’n Golf von Honduras för sik reklameert. Rejell kunn Spanien dat aver kuum dörsetten. Dat hebbt de Briten utnütt un anfungen, dor Campechebööm to slahn. Dat Campecheholt is as Farvstoff bruukt worrn. Later is ok Chicle wunnen worrn un se hebbt Mahagoni-Bööm slahn. Holt un Chicle sünd na Grootbritannien bröcht worrn. De Engelschlüüd, de de Holtfälleree un den Hannel bedreven hebbt, sünd Baymen nöömt worrn.

Grootbritannien hett de Baymen ünnerstütt, hett dat Rebeed aver toeerst nich offiziell reklameert, denn de Briten wullen sik nich mit Spanien anleggen, dat dat Rebeed jümmer noch reklameren dee. Dorüm hebbt de Baymen sik deelwies sülvs verwaltet un dorbi stünnen de Intressen von de Holtfällers un Hannelslüüd in’n Vörgrund. Annerwegens in Middelamerika hett dat vergliekbore Strukturen geven, de aver von Plantaaschenbesitters domineert weren. Düsse Strukturen sünd Plantocracy nöömt worrn. De Begrepen Forestocracy un Plantocracy sünd dorüm eng verwandt.

De Överschicht bestünn ut en lüttje Grupp von Europäers. De gröttste Deel von de Inwahners, de an de Herrschop nich bedeligt weer, bestünn aver ut inheemsche Mayas un Swarte, de as Slaven importeert worrn sünd. Ok Indentur-Arbeiders hett dat geven. De Slaven sünd 1838 freelaten worrn, weren aver ok na düsse Tied to’n gröttsten Deel rechtloos vergleken mit de Europäers.

Von 1749 bet 1862 harr en brietschen Supperndent de Opsicht över dat Rebeed. 1862 is Brietsch-Honduras en Kolonie worrn un harr denn en brietschen Guvernör.