Engelschen Kanal

Vun Wikipedia
De engelsche Kanal

De Engelsche Kanal (Franzöösch: La Manche (Mauen); Engelsch: The English Channel) is de See oder Seestraat twuschen Grootbritannien un Frankriek. Se verbinnt de Noordsee mit den Atlantik. De smallste Stäe ganz in'n Osten heet ok Straat vun Dover oder Engde vun Calais. In de Alldagsspraak warrt mit den Kanal faken düt Rebeed twuschen Calais un Dover meent.

De Engelsche Kanal is in'n Döörsnitt bi 60 m deep. De deepste Stäe liggt bi 120 m. In den Kanal gifft dat unbannigen Verkehr vun Seescheepen. Bi Floot steiht de Waterstroom vun West na Oost un bi Ebbe loppt dat Water annersrum. For de Sekerheit vun de Schipperee sünd dor Routen for de internatschonale Seefohrt inricht, de bit an de Düütsche Bucht henföhrt.

Just vor de franzöösche Küst vun de Normandie liggt de Kanaleilannen. Dat is en Inselgrupp, de höört to den Brittschen Kroonbesitt (Crown dependencies). Dor hannelt sik dat um half-unafhängige Staten bi. De Insel Wight is dat gröttste Eiland in den Engelschen Kanal. Annere Eilannen vor de franzöösche Küst sünd de Chausey-Eilannen, Mont Saint-Michel, Tatihou un de Sint-Marcouf-Eilannen

De längsten Ströme, de in den Kanal utmünnen doot, sünd de Seine un de Somme.