Echte Goldpeer

Vun Wikipedia
Echte Goldpeer
Fehnglasemaker (Aeshna juncea)
Systematik
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten
Ünnerklass: Fleeginsekten (Pterygota)
Ornen: Goldpeer (Odonata)
Wetenschoplich Naam
Anisoptera
Sélys, 1854

De Echten Goldpeer oder Verschedenflunken (Anisoptera) sünd en Unnerornen vun grote Insekten, de tohopen mit twee annere Unnerornen de Ornen vun de Goldpeer (Odonata) utmaken doot. Över de ganze Welt hen sünd woll bi 3.000 Aarden vun Echte Goldpeer beschreven. In Europa kaamt avers man bloß 90 Aarden vör, in de Nedderlannen un Belgien sünd dat 45 Aarden, in Düütschland gifft dat alltohopen 51 Aarden.

Echte Goldpeer könnt vun de Jumfern goot ut’neen holen weern. Dat Lief is ganz anners tohopenboot. Bi de Echten Goldpeer sünd de Achterflunken breeder, as de Vörflunken. Dor kümmt ok de wetenschoppliche Naam Anisoptera vun her. De bedutt: Verschedenflunken. Bi de Jumfern sünd de Flunken vörn un achtern nu just liek, wat ja ok de wetenschoppliche Naam Zygoptera bedüden deit. Wenn de Echten Goldpeer sitten gaht, foolt se jem ehre Flunken nich över dat Achterlief tosamen, man se streckt se na de Sieten hen ut. Echte Goldpeer sund ok, anners as de Jumfern, wohre Fleegkünstlers.

In’t Allgemeene weert de Echten Goldpeer ok grötter (32 bit 105 mm), as de Jumfern (23 bit 49 mm). Ok jem ehre Larven bruukt länger to’n Wassen, as de Jumfernlarven. En enkelte Aart kümmt mit en paar Maanden as Larve torecht, man bi de meisten Aarden överwintert de Larve 1 - 3 mol (5 mol kümmt ok vör). Dat utslüppte Goldpeerd süms leevt bi de Echten Goldpeer jummers bloß man en paar Weken oder Maanden.

Jumfern sünd wat fiener boot un slanker, dat Achterlief is jummers rund un dünn. Bi Echte Goldpeer is dat Achterlief dicker un towielen ok platt. Ok de Ogen verscheelt: De vun de Echten Goldpeer sünd grötter un röögt an’anner, bloß nich bi de Kohsteerten. De Ogen vun de Jumfern sünd wat minner groot un staht wieter ut’neen.

De Echten Goldpeer un ok de Jumfern kennt en Unvullstännigen Gestaltwessel. De Larve strepelt ehre Huut af un warrt denn na dat leste Mol en Insekt mit Flögels un mit faken dannige Farven. De Larve is um un bi fiev cm lang, mit en tämlich breden Achterlief ohn Steertkemen. Larven vun de Echten Goldpeer hefft en Strahlandriev: Se pumpt Water na binnen un drückt dat denn an de Achtersiet wedder na buten un so suust se vörut.

Taxonomie[ännern | Bornkood ännern]

In Noorddüütschland, Belgien un de Nedderlannen[ännern | Bornkood ännern]

Al Familien vun de Welt[ännern | Bornkood ännern]


Biller[ännern | Bornkood ännern]

Kiek ok bi[ännern | Bornkood ännern]

Borns[ännern | Bornkood ännern]