Dreeeckspinn
| Dreeeckspinn | ||||||||||||||||
|---|---|---|---|---|---|---|---|---|---|---|---|---|---|---|---|---|
 | ||||||||||||||||
| Systematik | ||||||||||||||||
| ||||||||||||||||
| Wetenschoplich Naam | ||||||||||||||||
| Hyptiotes paradoxus | ||||||||||||||||
| (C. L. Koch, 1834) |
De Dreeeckspinn oder Dreeeckspinne (Hyptiotes paradoxus) is en Aard mank de Spinnen ut de Familie vun de Krüselradspinnen (Ulboridae). Se is vun de „Arachnoloogsche Sellschop“ to de „Spinn vun dat Johr“ 2009 wählt wurrn.
Kennteken
[ännern | Bornkood ännern]Heken sünd woll bi 4 mm lang, Seken 5-6 mm. Wenn een vun baven dalkieken deit, is dat Vörlief (Prosoma) tämlich rund, wenn een vun de Sieten kickt, is’t in’e Midden wat höger. Dat dannige Achterlief sütt vun de Sieten ut, as en Dreeeck. De Farv is tämlich unnerscheedlich, mol wat geel, gries, root oder bruun, faken mit swarte Placken dor up, oder ok ganz swart.
De Heken dreegt unbannig grote Bulbi an de Pedipalpen an’n Kopp. De sünd just so groot, as dat ganze Vörlief. Dat Achterlief is bi de Heken wat länger, as bi de Seken. Wat de Klöör angeiht, gifft dat keene Unnerscheden mank de Geslechter.
Wo de Dreeeckspinnen leven doot
[ännern | Bornkood ännern]De Aart kümmt bloß vör, wo dat junge Fichtenbööm gifft. Dor wahnt se tomeist in de unnern, afstorven Twiegen vun junge Bööm bit 10 m. In Middeleuropa is se de eenzige Aart vun dat Geslecht Hyptiotes. Hier kümmt se faken vör.
Se leevt vun Irland in’n Westen bit na Middelsibirien un Oostchina, un vun Norwegen un Sweden in’n Noorden bit na Portugal, de Kanaren un den Süüden vun Grekenland. De Spinne is in de matigen un in de subtropischen Zonen to finnen. In Europa fehlt se bloß man in Finnland un Iesland.[1]
Wie düsse Spinnen leevt
[ännern | Bornkood ännern]Düsse Aart is bekannt vunwegen ehr sünnerlich ummuddelt Radnett. Dat hett dree Ecken un besteiht bloß noch ut dree Segmenten vun en normol Radnett. Dat gifft also bloß noch veer Radialfadens un dormank de parallelen Fangfadens. An de beiden bütersten Punkten warrt dat Nett an’n Unnergrund fastmaakt. Wo sik de Radialfadens snieden doot, weert se tohopenknütt to en Signalfaden un denn länger maakt. Düssen Signalfaden höllt de Spinne mit ehre Vörbeen fast. De Spinne sitt tomeist nich up en Twieg, man hangt dor mit en lüttjen Faden an, de ut de Spinnwarten uttreden is. Wenn nu en lüttjet Deert in dat Nett rinflegen deit, denn so maakt de Spinne den Faden an ehr Achtereene heel gau länger. Dor sackt denn dat Nett um över de Büüt tosamen. Just so, as al Krüselradspinnen hett de Aart keene Giftdrüsen. De Büüt warrt to en Packen tohopenspunnen, de sik nich mehr rögen kann un denn warrt se utsuugt. Riepe Deerter kann een vun Juli bit to’n Oktober hen finnen. Dat Eikokon is wat platt un warrt afleggt up en Fichtentwieg.
Gefohr
[ännern | Bornkood ännern]De Aart kümmt wiet un siet vör. In Gemarken, de passlich sünd, is se faken to finnen. In Düütschland steiht se up de Rode List inschreven as „nich in Gefohr“.
Belegen
[ännern | Bornkood ännern]Literatur
[ännern | Bornkood ännern]- Heiko Bellmann: Kosmos Atlas Spinnentiere Europas. 3. Upl., 2006. Kosmos, Stuttgart, ISBN 978-3-440-10746-1.
- Ralph Platen, Bodo von Broen, Andreas Herrmann, Ulrich M. Ratschker & Peter Sacher: Gesamtartenliste und Rote Liste der Webspinnen, Weberknechte und Pseudoskorpione des Landes Brandenburg (Arachnida: Araneae, Opiliones, Pseudoscorpiones) mit Angaben zur Häufigkeit und Ökologie. In: Naturschutz und Landschaftspflege in Brandenburg. 8, Heft 2 (Bilaag); 1999.