Diskuschoon:Dintenfische

Blackfisch

Ik kann mi besinnen, datt ik Black as oold Woort for Dinte al höört hebb. Bi Sass steiht dor nix vun in, bi Böning hebb ik den Henwies Jeverland un Süüdoost-Ollenborg funnen. Also Black for Dinte geiht up jeden Fall dör. Man gifft dat ok bloß en enkelten Beleg over Blackfisch? Oder is dat nich doch ehrder en Kunstwoort?--Bolingbroke ✍ 16:42, 27. Jul. 2017 (CEST)

Is mi in'n Alldag tomindst noch nich vörkamen. --Iwoelbern ✍ 16:52, 27. Jul. 2017 (CEST)

Black is dat ole plattdüütsche Woord för de Schrievfarv. Dint(e) is en Woord, wat ut dat Hoochdüütsche övernahmen is (mit en d, wat von de Etymologie nich passt, kummt von latiensch tincta un müss dorüm ok op Platt en t hebben, aver bi de Övernahm ut dat Hoochdüütsche hebbt de Lüüd annahmen, dat is dat sülve as bi Disch/Tisch). Black heff ik in miene Wöörböker ünner annern bi Heinrich Teut in sien Hadeler Wörterbuch, bi Vosslo/Teuchert in dat Mecklenburgische Wörterbuch un bi Eduard Kück in sien Lüneburger Wörterbuch funnen. Kück schrifft dorto, dat Black dat öllere Woord is, de Kinner över de School aver vör allen Dinte kennenlehrt un fakener düt Woord bruukt (de Band is von 1942).

Nu to’n Blackfisch: dat weer fröher an de Küst dat allgemene Woord för dat Deert. Weer so begäng, dat dat in dat 18. bet fröhe 20. Johrhunnert sogor in dat Hoochdüütsche so bruukt worrn is. To’n Bispeel hett de Brockhaus von 1911 noch en Indrag to dat Woord: [1]. Aver ok al in de Hansetied is dat Woord so bruukt worrn. De Sweedschen seggt bläckfisk un de Däänschen hebbt ok blækfisk seggt, bevör sik dat Woord blæksprutte dörsett hett. Mien Dansk etymologisk ordbog seggt, dat dat Woord ut dat Middelnedderdüütsche kummt.

Wat ik aver togeven mutt: ik heff nix funnen, wo dat Woord in de jüngere Literatur vörkummt. Is ok keen Deert, över dat de Plattdüütschen faken snackt. Wenn dat nich jüst üm de Fischeree geiht. Villicht mutt ik noch maal in de Böker von de Kinaus von Finkwarder rinkieken... --::Slomox:: >< 08:44, 28. Jul. 2017 (CEST)

To de Theorie, dat de Plattdüütschen dat d in Dinte rinbröcht hebbt: dat heff ik so leest, aver dat is nich wohr. Dat Woord kummt von dat latiensche tincta, aver ok de Hoochdüütschen hebbt bet in dat 19. Johrhunnert beide Formen bruukt, Tinte un Dinte. Dat de Plattdüütschen dor d hebbt, liggt also blots dor an, dat se dat Woord in en Tied ut dat Hoochdüütsche övernahmen hebbt, as sik dat Hoochdüütsche noch nich op een Form fastleggt harr. --::Slomox:: >< 12:36, 28. Jul. 2017 (CEST)

Ischa mol wedder bannig interessant! Nu mösst du bloß noch rutfinnen, ob en levennigen Schriever (oder en Finkwarderschen Fischermann) ok mol den Naam Blackfisch bruukt hett. Gifft dat denn egentlich Dintenfische in'e Noordsee? Denn konn man ja ok bi de Noordfresen noch mol nafragen. De Oostfresen seggt ja Enktfisken...Bolingbroke ✍ 15:10, 28. Jul. 2017 (CEST)