Christian Ludwig von Hake
Christian Ludwig von Hake (* 5. Dezember 1745; † 1818 in Stood) weer en düütschen Jurist un Verwaltungsbeamten.
Von Hake is 1745 boren. He is an’n 25. Mai 1775 Ehrenliddmaat von de Landweertschopssellschop in Celle worrn un an’n 1. März 1778 Würklichen Gehemen Kamerraad.[1] 1779 is he Baas von dat Hoffbo- un Goorndepartement in Hannover worrn[1] un dat bet 1799 bleven. 1798 hett he den Rang von en General kregen.[1]
He weer von 1800 bet 1810 Vörsitter von de Regeren von Bremen-Veern un Greev von dat Land Hadeln.[1] Gliektiedig hett he ok dat Amt as Direkter von de Justizkanzlie Stood un dat Hoffgericht Stood övernahmen. 1801 hett he den Rang von en Würklichen Staatsminister kregen. 1816 hett he von Engelbert Johann von Marschalck as Vörsitter von de Regerenskommission noch en tweet Maal dat Leid över Bremen-Veern övernahmen. Dat güng denn bet to sien Dood 1818. Na sien Dood hett von Marschalck dat Amt wedder övernahmen.
1797 hebbt Heinrich Adolf Schrader un Johann Christoph Wendland in Sertum Hannoveranum en nee opdeckt Geslecht von Büsch ut Australien beschreven un em to Ehren Hakea döfft.
He weer verheiraadt mit Wilhelmine Friederike Amalie von Wallmoden (* 1756). De beiden harrn den Söhn Johann Christoph Georg Adolph von Hake (1779–1840) un de Dochter Frederike Luise Sophia von Hake (29. Mai 1786-12. Februar 1857).