Carl von Hammerstein-Gesmold

Carl Wilhelm Frithjof Freiherr von Hammerstein-Gesmold (* 30. September 1866 in Veern; † 13. Mai 1932 in Zeven) weer en düütschen Verwaltungsbeamten.

Von Hammerstein-Gesmold is 1866 as Söhn von Ingeborg, borene Marschalck von Bachtenbrock (13. August 1845–11. August 1910; Dochter von Carl Detlev Marschalck von Bachtenbrock), un Emil Ferdinand Victor von Hammerstein-Gesmold (30. Januar 1827–11. August 1894) in Veern boren. Sien Broder weer de Offzeer Frithjof von Hammerstein-Gesmold. De Familie hett dat Good Bokel tohöört. Dor hett von Hammerstein-Gesmold leevt, wenn he nich annerwegens ünnerwegens weer. He weer in Stralsund un Pforzheim op Gymnasium un hett denn Juristeree an de Universitäten Straßburg, Berlin un Göttingen studeert. In Straßburg is he Maat von dat Corps Rhenania Straßburg worrn. 1888/1889 hett he sien Wehrdeenst as Eenjohrig-Freewilligen daan. Na de eerste Staatsprüfung is he 1893 Referendar bi dat Oberlandsgericht Celle, in Hilmssen un bi dat Amtsgericht Zeven worrn, 1895 Regerungsreferendar bi de Regerung in Hilmssen un 1898 Regerungsassesser bi dat Landraadsamt von’n Kreis Lübbecke.

He is 1900 as Nafolger von Ludwig Lessing toeerst kommissarsch, 1901 denn richtigen Landraad von’n Kreis Zeven worrn un dat bet 1930 bleven. Em aflööst hett Ludwig Hamann. He güng denn in einstweiligen Rohstand un an’n 1. Oktober 1931 in richtigen Rohstand.

Von 1900 bet 1932 weer he Afornten in’n Provinziallanddag Hannover. 1930 is he Ehrenbörger von de Stadt Zeven worrn.

He is 1932 in Zeven doodbleven un liggt op’n Karkhoff von Jeem begraven.

He hett an’n 4. März 1900 in Hilmssen Marie Sophie Freiin von Bothmer (21. November 1875–21. September 1959) freet. De beiden hebbt de Söhns Frithjof Günther Emil Ferdinand von Hammerstein-Gesmold (29. April 1902–14. Oktober 1977) un Sigurd Carl von Hammerstein-Gesmold (* 25. Juli 1907; vermisst 4. Juli 1944) hatt.