Bunnendoor
Bunnendoor (hoochdüütsch Buntentor) is en Oortsdeel vun Bremen un höört to den Stadtdeel Neestadt.
Laag
[ännern | Bornkood ännern]Bunnendoor liggt dune bi de olen Grenzen vun de Stadt Bremen in’n Süden vun de Werser. De Grenzen vun den Oortsdeel sünd in Noorden de Lüttje Werser, in’n Süden de Garstfeldstraat, in’n Westen de Friedrich-Ebert-Straten un in’n Oosten Huckelriede. In Bunnendoor is hüde dat letzte Stück vun den olen Stadtgraven op de Neestädter Siet vun Bremen to sehn. Dat heet hüde Piepe, weil dat as een Piep utsehn deit. De Piepe wiest, wo de Grenz nah de ole Stadt weer. Dor löppt hüde de Oosterstraten.
Historie
[ännern | Bornkood ännern]Bi de Oosterstraten stunn fröher dat „Bunte Door“. Dat weer een vun de twee Porten nah de Stadt rin. Dör düt Door dör föhr een Straat nah buten de Stadt. De güng öber Huckelriede nah Habenhusen oder nah Kattentoorn un Brinkem. Düsse Straat is hüde de Hööftstraat vun dat Bunnendoorsquartier un heet Bunnendoorsteenweg.
In dat Bunnendoorviddel leven fröher lüttje Lüe. De meisten verdenen ehr Geld as Zigarrenmaker. An de Eck vun’n Bunnendoorsteenweg un den Karkweg steiht hüde een Denkmal för düsse Zigarrenmaker.
De Lüe weeren arm und hefft sik Geld toverdeent bi’t Smuggeln dör de Tollgrenz dör. Besunners hefft se mit Toback smuggelt. De Bläder vun den Toback hefft se sik ünner de Boxen üm de Been ümto tüdelt. Dor kümmt woll ok de Ökelnaam vun de Bunnendoorschen vun her: Se weert in Bremen Geelbeen nömmt.
1875/76 is mit Hölp vun de Binnenmission de St.-Jakobi-Kark boot wurrn. Toeerst höör de Gemeende nah de ole Neestädter St.-Pauli-Kark to. 1884 is de Gemeende sülvstännig wurrn.
Hüdigendags
[ännern | Bornkood ännern]Hüdigendags deit sik allerhand in’n Bunnendoor. In de verleden Jahren is een Beginenhoff boot wurrn, een Galerie vun de Stadt Bremen, een Speelstäe för modern Theater. Bunnendoor liggt bi den Sozialindex vun de Stadtdelen un Oortsdelen vun Bremen in de Midden.
Bi de Wahl för den Bundsdag an’n 18. September 2005 hefft de Bunnendoorschen so afstimmt (tweede Stimm): SPD 38,0 % CDU 15,4 % Bündnis 90/De Grönen 26,0 % De Linke 13,3 %.
