Huckelriede

Huckelriede is en Oortsdeel in’n Stadtdeel Neestadt in Bremen. 1995 wohnen dor 6.322 Inwohners. Al in dat Johr 1489 warrt Huckelriede to’n eersten Maal nömmt. De Kundige Rulle seggt dormals, Bremer Börgers schöllt de Huckelriede in jem ehren Testament mit 1 Mark bedenken. De Huckelriede weer to de Tiet en Straat. In Renner sien Chronik vun 1583 steiht to lesen, dat dat eerste Plaster för de Huckelriede vun de Steene vun de Witteborg herkeem, de 1222 twei maakt wurr. In’t 19. Jahrhunnert güng de Naam vun de Straten to een Landgoot an de Habenhuser Landstraten över. Later wiet sik de Naam ut up en Land mit Neeboohüser un 1935/1936 up de Kasernen, de dor anleggt wurrn sünd. In Huckelriede gifft dat vun dat Jahr 1949 af an de Roland-Klinik. Dat is en privaat Krankenhuus. 1956 is en grote Karkhoff in’n Deenst nahmen wurrn. De gröttste Binnensee vun Bremen, de Werdersee liggt ok in Huckelriede. Anunvörsik is de utgraven wurrn, dat dat Water bi Floot vun de Werser aflopen kann.