Habenhusen

Vun Wikipedia
Wesseln na: Navigatschoon, Söök

Habenhusen mit Ton up dat „a“ („Håbenhusen“) is en Oortsdeel vun den Stadtdeel Övervieland an den Rand vun Bremen-Süüd.

Bit 1945 höör Habenhusen to dat Landgebiet vun Bremen un wurr vun 'n Landherrenamt in de Stadt regeert. Nah den Krieg keem Habenhusen denn to de Stadt Bremen.


Vergahn Tiet[ännern | Bornkood ännern]

Dat Denkmol för de Doden ut den Eersten Weltkrieg

In de Geschicht dükert Habenhusen to'n eersten Mol up an'n 27. September 1124 in en Urkunn vun Paavst Calixt II. för dat Klooster Raastäe. Dormols warrt de Naam „Habenhuson“ schreven. Bit in dat 19. Johrhunnert weer Habenhusen een Buurndorp, loter leeften dor meistendeels Arbeiders un Strotenmokers. To Pingsten 1911 hett dat een' groten Brand in 't Dörp geben. Dor sund wecke vun de gröttsten Buurnhüser afbrennt. De meisten wurrn later woller upboot. Noh den Eersten Weltkrieg keemen veel Lüe ut de Stadtdelen vun de Arbeiders in Bremen na Habenhusen: Dor wurrn „Siedlungen“ boot. Tolest hefft se to de Tiet vun 'n Natschonalsozialismus ok noch een Siedlung hensett, dor hefft se denn SA-Lüe un jem ehre Fomilien henstüert in dat rode Hobenhusen, wo de meisten Inwahners dat mit de SPD holen döen.

Hüdigendags[ännern | Bornkood ännern]

Siet 1974 is in Habenhusen denn de moderne Städteboo in Gang ween. Een Stroot noh de annere hefft se vullboot mit Een-Fomilien-Hüser. In düsse Tiet hett sik dat Leben in Habenhusen natürlich duchtig verännert. Vundaag is Habenhusen in den Sozialindex vun de Stadt Bremen ganz baben upföhrt. Habenhusen is een vun de veer Ortsdelen (vun mehr as 80, de dor upföhrt sund) mit dat höögste Inkamen un de ringsten sozialen Problemen. In Habenhusen gifft dat een Grundschool un een School vun de Sekundorstufe I, de weert ünnerholen vun dat Land Bremen, dorto noch een private Grundschool un private School mit Sekundorstufe I un II. Düsse Privootschool is de „Freie Evangelische Bekenntnisschule“.

Inwohners[ännern | Bornkood ännern]

1812 leven in Habenhusen 402 Inwahners; 1855: 639 Inwahners; 1885: 857 Inwahners; 1905: 3.169 Inwahners; 1955: 4.164 Inwahners; 1974: 3.433 Inwahners; 1995: 8.381 Inwahners; 2003: 8.300 Inwahners; 2005: 8.195 Inwahners


Karken[ännern | Bornkood ännern]

De Simon-Petrus-Karken un dat Gemeendezentrum (achtern), vun de Habenhuser Dörpstraat ankeken

Twee Karken sund in Habenhusen tohuse, ofschoonst de Habenhuser Johrhunnerte lang jümmers noh Oorssen noh Karken gohn sund. 1995 hett de Evangelische Gemeende Oorssen un Habenhusen de Simon-Petrus-Karken boon loten. Dor gifft dat een Toorn mit een Klockenspeel vun 24 Klocken to hören. In de Karken sund schöne Finster vun Hella Santarossa ut Berlin und annere Kunst vun Thomas Duttenhoefer ut Darmstadt. Een Orgel vun de Firma Späth ut de Swiez steiht dor ok in. Noh de Evangeelsche Gemeende höört um un bi 4100 Moten to. In de Simon-Petrus-Karken warrt jummers an'n drüdden Freedag in'n Februar dat Habenhuser Schaffermahl fiert.

Ungefähr to de sülbige Tiet hett de Evangeelsche Freekarken „Paulusgemeende“ dor in een olen, ümbooten Buurnhoff ehre Karken opmaakt. Düsse Gemeende höört to de Pingstkarken noh de Mühlheimer Richtung un kickt jümmers noh Amerika, wie man dat dor so maken deit, mit de Karken. No düsse Karken höört um un bi 600 Moten.

Wat süß noch wichtig is[ännern | Bornkood ännern]

In Habenhusen gifft dat ook een groot Gewerbegebiet, wo de Lüe allens inköpen köönt, wat se man bloß bruken doot in Boomarkt, Supermarkt, Autoverkoop un wat nich allens. Allerhand Firmen sünd dor ook tohuse. Twee Sportvereene gifft dat in Habenhusen: Den ATSV, dor worrt vör allen Handball speelt, un denn noch de Habenhuser FV, dat is een Footballvereen.


De Freden vun Habenhusen[ännern | Bornkood ännern]

Carl Gustaf Wrangel (1613 - 1676)

In de Geschicht speelt Hobenhusen en besunnere Rull, weil dor in dat Johr 1666 de Freden twüschen Bremen un Sweden sloten worrn is. Dat weer an’n 15. November. Dormols weer Sweden een Grootmacht. De General vun de Sweden weer Carl Gustav Wrangel, de laterhen in dat Johr 1675 den Krieg gegen den Kurfürsten vun Brannenborg verloren hett.


Böker öber Habenhusen[ännern | Bornkood ännern]

Hermann Frese: Habenhausen. Ein Streifzug durch neun Jahrhunderte, Bremen 1986, ISBN 3-920699-79-3