Bundsschattministerium

Dat Bundsschattministerium weer en Ministerium vun de Bundsrepubliek Düütschland. Grünnt worrn is dat 1949 as Bundsministerium för Saken vun’n Marshallplaan. De Naam kummt dorvun, dat de Opgaav vun’t Ministerium toeerst mol dorin bestünn, de Saken vun’t European Recovery Program to regeln, dat in de Ümgangsspraak beter ünenr den Naam Marshallplaan bekannt is. In den Tosamenhang schüll dat vör allen mit de OEEC tosamenarbeiten, wat de Vörlöperorganisatschoon vun de hüütige OECD weer.

As de Marshallplann utlopen weer, is dat Ministerium 1953 in’n Rahmen vun’t Neebilln vun Bundskabinett ünner Adenauer in Bundsministerium för weertschoppliche Tosamenarbeit ümnöömt worrn (Wohrschau: nich verwesseln mit dat hüütige Bundsministerium för weertschopplich Tosamenarbeit un Entwickeln). Dat geev nu keen Middel mehr ut dat European Recovery Program, liekers weer de Opgaav ok wieterhen de Wedderopbo vun Europa, da dör den Krieg toschannen weer.

In’t Johr 1957 is de Naam noch mol ännert worrn in Bundsministerium för weertschopplichen Besitt vun’n Bund, bit dat 1961 to’n Amtsantritt vun Minister Lenz sien letzte Beteken as Bundsschattministerium kregen hett. 1969 is dat Ministerium denn oplöst worrn. Sien Opgaven weern to’n Deel op’t Bundsministerium för Finanzen överdragen, un to’n Deel op dat Bundsministerium för Weertschop.

Dat Ministerium harr sien Sitt de hele Tiet över in’t Huus Carstanjen in’n hüütigen Bonner Stadtbezirk Bad Godesberg.

Bundsminister 1949 bit 1969

Nr.	Naam	Levenstiet	Partei	Anfang vun de Amtstiet	Enn vun de Amtstiet
Bundsminister för Saken vun’n Marshallplaan
1	Franz Blücher	1896–1959	FDP	20. September 1949	20. Oktober 1953
Bundsminister för weertschoppliche Tosamenarbeit
1	Franz Blücher	1896–1959	FDP (bit 1956) FVP/DP (af 1956)	20. Oktober 1953	29. Oktober 1957
Bundsminister för weertschopplichen Besitt vun’n Bund
2	Hermann Lindrath	1896–1960	CDU	29. Oktober 1957	27. Februar 1960
3	Hans Wilhelmi	1899–1970	CDU	4. Mai 1960	14. November 1961
Bundsschattminister
4	Hans Lenz	1907–1968	FDP	14. November 1961	19. November 1962
5	Werner Dollinger	1918–2008	CSU	14. Dezember 1962	30. November 1966
6	Kurt Schmücker	1919–1996	CDU	1. Dezember 1966	21. Oktober 1969

Beamtete Staatssekretären

1950–1952: Walther Gase
1957-1961: Hans Busch
1962-1963: Hans-Hellmuth Qualen (FDP)
1963-1965: Ludwig Kattenstroth
1966: Rolf Thiessen
1966-1968: Wolfram Langer
1968-1969: Rudolf Vogel (CDU)

Kiek ok

Rieksschattministerium

Bundsministerien in Düütschland