Bowmore (Brenneree)
| Bowmore | |
|---|---|
 Brenneree Bowmore | |
| Land | Schottland |
| Region | Islay |
| Tyyp | Malt |
| Status | aktiv |
| Besitter | Suntory |
| Grünnt | 1779 |
| Grünner | David Simson |
| Waterborn | River Laggan |
| Washstill(s) | 2 × 30.940 l |
| Spiritstill(s) | 1 × 14.750 l, 1 × 14.637 l |
| Produkschoonsvolumen | 2.000.000 l |
| Websteed | www.bowmore.com |
Bowmore is en Whisky-Brenneree op dat schottische Eiland Islay, Schottland. Se is in Besitt vun den japaansch-US-amerikaanschen Kunzern Beam Suntory.
Historie
[ännern | Bornkood ännern]
De Destille Bowmore is 1779 vun David Simson grünnt worrn, de ehr na de Stadt Bowmore nöömt hett. De Brenneree weer de eerste legale Destille op dat Eiland un tellt to de öllsten Brennereen vun Schottland. So as de meisten Destillen in Schottland hett ok Bowmore faken den Besitter wesselt: Toeerst weer dat Ünnernehmen ünner dat Regeer vun den Grünner, Buern un Hännler David Simson. Sien Familie hett dat Ünnernehmen wieterföhrt, bit 1837 William & James Mutter de Brenneree övernahmen hebbt. De Anlagen weern 1925 an Joseph Robert Holmes verköfft un ümnöömt to Bowmore Distillery Co, Besitter weer de Sheriff’s Bowmore Distillery Ltd.
In’n Tweeten Weltkrieg weer de Brenneree dicht maakt. De Bowarken weern vun’t Militär as Stüttpunkt för Flaagbööd bruukt. 1950 is de Anlaag an William Grigor & Sons Ltd. övergahn, de aver 1963 bankrott gahn sünd. Dorophen is de Destille vun de Stanley P. Morrison Ltd. köfft worrn, de ok Auchentoshan un Glen Garioch besitten de. Vun de Tiet an is dat hüütige Bowmore-Image prägt worrn. De ne’e Naam Morrison Bowmore keem 1987. Siet 1994 is de Brenneree-Anlaag nu in’n Besitt vun de japaansche Suntory-Grupp.
Sünnerheiten vun de Brenneree sünd de egene Molteree as ok en Swemmbad, dat in en olle Lagerhall inricht worrn is un dör de Warms bedreven warrt, de bi de Produkschoon freesett warrt. In de Brenneree gifft dat en Besöker-Zentrum, un se kann ok besichtigt warrn.
Produkschoon
[ännern | Bornkood ännern]
Bowmore höört to dat schottische Whisky-Rebeet Islay un betütt dat Water för de Produkschoon ut den River Laggan. Brennt warrt in twee wash stills to 30.940 l un twee spirit stills: een mit 14.750 l un de annere mit 14.637 l. De Whisky is bekannt för sien törfig Aroma, dat he dör dat Water ut den Stroom Laggan kriggt. De meisten Whiskys vun Bowmore warrt in spaansche Sherryfatten lagert, wat jem en tyypsch Aroma vun Sherry mitgeven deit.
Kiek ok
[ännern | Bornkood ännern]Literatur
[ännern | Bornkood ännern]- Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
- Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.
Weblenken
[ännern | Bornkood ännern]
Koordinaten:55° 45′ N, 6° 17′ W