Blue Steel (1934)
| Filmdaten | |
|---|---|
| Plattdüütsch Titel: | — |
| Originaltitel: | Blue Steel |
| Düütsch Titel: | Showdown am Adlerpass |
| Produkschoonsland: | USA |
| Johr vun’t Rutkamen: | 1934 |
| Läng: | 54 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Robert N. Bradbury |
| Dreihbook: | Robert N. Bradbury |
| Produkschoon: | Paul Malvern |
| Kamera: | Archie Stout |
| Snitt: | Carl Pierson |
| Dorstellers | |
| |
Blue Steel (op platt so veel as „Blau Stahl“; dt. Titel: Showdown am Adlerpaß) is de Titel vun en US-amerikaanschen B-Western ut dat Johr 1934 mit John Wayne in de Hööftrull. Speelbaas weer Robert N. Bradbury, de ok dat Dreihbook to den Film schreven hett. De Film is an verscheden Öörd in’n US-Bundsstaat Kalifornien dreiht worrn[1]. De Premiere weer an’n 10. Mai 1934 in de USA[2].
Inholt
[ännern | Bornkood ännern]Laat in de Nacht bringt en Postkutsch 4000 US-Dollar in en Hotel, dat in’n Safe inslaten warrt. Man, buten hett en Röver luert un sik de Kombinatschoon vun den Safe afkeken un holt dat Geld dor rut, as all slapen doot. Dat kriggt ok John Carruthers mit, de sik to’n Slapen heemlich in dat Hotel sleken harr. De Sheriff sett em na, vunwegen dat he em in Verdacht hett. Man, den annern Dag kummt dat in de Neeg to en Överfall op en Trek mit Levensmiddel un Woren, bi den Dan Mason dootschaten warrt. John un de Sheriff kamt sien Dochter Betty to Hülpt un verfolgt de Banditen. Dorbi fallt de Sheriff vun’t Peerd in en Slucht. John kann em aver redden.
Betty finnt Ünnerkunft bi den rieken Ünnernehmer Malgrove, de de heemliche Kopp vun de Bande is. Dör de velen Överfäll, hebbt de Lüüd in de lütten Stadt nix mehr to eten. Malgrove beedt jüm dorüm an, jemehr Land aftoköpen, man John hollt jem eerstmol dorvun af. Op Malgrove sien Ranch höört Betty tofallig, as Malgrove mit den Deef Danti över jemehrn Plaan snackt. So kriggt se rut, dat he de Baas vun de Rövers is, un se de Inwahners ut de Stadt verdrieven wüllt, vunwegen dat en Goldader dör dat Land geiht. Betty warrt aver bi’t Lüüstern opdeckt un insparrt.
John hett al lang Malgrove in Verdacht, wat mit de Bande to doon to hebben un ritt em heemlich achteran. So finnt he dat Versteek vun de Bande. De Sheriff un he befreet toeerst Betty Mason un finnt blangento ok noch de Levensmiddel, de in de verleden Weken roovt weern. Se bringt de Levensmiddels torüch in de Stadt un künnt dorbi de bande tonichten maken. De Inwahners freit sik, as se vun de Goldader höört un mit de Levensmiddel ok jemehr Överleven sekert is. An’t Enn kann John, de in Wohrheit en US-Marshal is, ok noch kloorstellen, dat Danti dat Geld ut’n Safe roovt hett. De Film ennt dormit, dat John un Betty Hand in Hand wegrieden doot un heiraten wüllt.
Borns
[ännern | Bornkood ännern]Weblenken
[ännern | Bornkood ännern]- Blue Steel in de Internet Movie Database (engelsch)
- De Film free to’n Daalladen in’t Internet Archive