Bernhard von Goeschen
Bernhard von Goeschen (* 4. März 1833 in Celle; † 13. April 1923 in Wolfspoint) weer en düütschen Verwaltungsbeamten.
Goeschen is 1833 in Celle as Söhn von’n Pastoor Adolf Goeschen boren. He weer von’n 1. Mai 1848 bet 10. September 1852 op de Kloosterschool Ilfeld un hett an de Universitäten Halle un Berlin Juristeree studeert. 1853 is he Maat von dat Corps Palaiomarchia Halle worrn[1] un 1854 von dat Corps Vandalia Berlin.[2] Na dat Studium güng he in’n hannöverschen Staatsdeenst. He weer Auditer in Horborg, Assesser in Läernstäine un Posen un Regerungsraad in Aken.
He is 1878 kommissarsch Amtmann von dat Amt Heien un Kreishauptmann von’n Kreis Heien worrn un hett dat Amt 1879 denn ganz övernahmen. Dat is he bet 1884 bleven. In dat Johr hett he Ernst von der Osten as Amtmann von dat Amt Horborg un Kreishauptmann von’n Kreis Horborg aflööst. Dat is he bleven, bet an’n 1. April 1885 de Ämter un Stüürkreise in de Provinz Hannover oplööst worrn sünd. An den Dag is he de eerste Landraad von’n ne’en Kreis Horborg worrn un is dat bet 1909 bleven. Sien Nafolger weer Felix Rötger.
Von Goeschen un sien Fro sünd in sien Rohstand in’t Allgäu trocken un later na ehren Söhn na Wolfspoint in Oberbayern.
Von Goeschen hett Clara Strube († 15. April 1923) ut Horborg freet. De beiden hebbt een Söhn hatt.
Dat Adelsprädikat von hett he an’n 1. Januar 1900 tokennt kregen. De noorden Deel von’n Rotenhüser Damm in Willemsborg hett fröher na em Goeschenstraat heten. Vondaag gifft dat noch en Goeschenstraat in Horborg.