Ben X
| Filmdaten | |
|---|---|
| Originaltitel: | Ben X |
| Düütsch Titel: | Ben X |
| Produkschoonsland: | Belgien, Nedderlannen |
| Johr vun’t Rutkamen: | 2007 |
| Läng: | 93 Minuten |
| Originalspraak: | Nedderlandsch |
| Öllersfreegaav in Düütschland: | FSK 12 |
| Filmkru | |
| Speelbaas: | Nic Balthazar |
| Dreihbook: | Nic Balthazar |
| Produkschoon: | Burny Bos, Peter Bouckaert, Erwin Provoost, Michiel de Rooij, Sabine Veenendaal |
| Musik: | Praga Khan |
| Kamera: | Lou Berghmans |
| Snitt: | Philippe Ravoet |
| Dorstellers | |
| |
Ben X is en belgisch-nedderlandschen Speelfilm ut dat Johr 2007. Speelbaas weer Nic Balthazar. He baseert op dat Book „Niets“ was alles wat hij zei, wat ok vun Nic Balthazar is. Dat Book wedder baseert op en wohre Geschicht vun en Jung mit Autismus, de sik vun’n Gravensteen doodsprungen hett, vun wegen, dat he in de School mobbt worrn is.
Wat dor in passeert
[ännern | Bornkood ännern]Ben Vertriest geiht op Beroopschool, steiht aver al siet siene Kinnertiet bi de annern jümmer en beten buten vör. In psychiatrische Behandlung stellt en Dokter fast, dat Ben dat Asperger-Syndrom hett. En nich ganz so dulle Form vun Autismus. Ben leevt in en egene Welt. Vör allen wichtig för em is dat Online-Speel Archlord. Jümmer, wenn he Tiet hett, speelt he dat. In Archlord is Ben X en Level-80-Held un in de Online-Welt hett he mit Scarlite sogor en Fründin. De Online-Welt mengelt sik al in siene reale Ümwelt un af un an kann Ben meist kuum mehr den Ünnerscheed utmaken. In de School warrt he vun siene Mitschölers mobbt. Besünners slimm warrt dat för Ben, as em de Mitschölers op en Disch in de Schoolklass stellt, em de Büx daltreckt, em utlacht un dor ok noch bi Films maakt mit jemehr Handys. Noch an’n sülven Dag staht de Films in’t Internett. De Welt brickt för em meist tohoop, dat he nu ok an’n eenzigen Oort belacht warrt, wo he sik stark föhlt harr, in’t Internett.
Ben will sik en Enn setten, en End Game. Scarlite will sik nu mit em drapen un em helpen. Se meent, dor is noch keen End Game, solang een noch en Healer hett. Tohoop mit Scarlite un siene Öllern maakt he en Film, de em wiest, dat he vun dat Deck vun en Fährschipp springt. De Lüüd schöölt denken, he is dood. Eerst op de Truurfier dükert Ben wedder vör siene truurnden un vun sien Dood schockten Mitschölers un Lehrers op un konfronteert jem mit dat Mobbing, dat he utsett weer.
Achtergrund
[ännern | Bornkood ännern]Vun dat Speel Archlord harr Speelbaas Nic Balthazar Verlööf kregen, de Speelwelt in’n Film to wiesen un to bruken. De Naam vun’n Film speelt in Leet-Form an op de nedderlandsche Utsaag (ik) ben niks (Ik bün nix).
Premier harr de Film an’n 26. September 2007. Düütsche Premier weer op de Berlinale 2008. In Düütschland is he an’n 8. Mai 2008 dör’n Filmverlehner Kinowelt in de Kinos kamen.
Nic Balthazar schall in de USA noch en Remake vun Ben X dreihn, för dat he ok en grötter Budget kriegen schall.
Rullen
[ännern | Bornkood ännern]| Schauspeler | Rull |
|---|---|
| Greg Timmermans | Ben |
| Laura Verlinden | Scarlite |
| Marijke Pinoy | Moder |
| Pol Goossen | Vader |
| Titus De Voogdt | Bogaert |
| Maarten Claeyssens | Desmedt |
| Tania Van der Sanden | Sabine |
| Johan Heldenbergh | Religionslehrer |
| Jakob Beks | Warkkunnlehrer |
| Gilles De Schryver | Coppola |
Priesen
[ännern | Bornkood ännern]Op dat Welt-Filmfestival in Montréal hett Ben X 2007 den Grand Prix des Amériques, den Publikumspries un den Pries vun de ökumeensche Jury wunnen. Op dat Internatschonale Filmfestival Middeloost in Abu Dhabi hett de Film 2008 ok den Hööftpries wunnen. Op dat Internatschonale Filmfestival in Istanbul 2008 hett de Film den Fipresci-Pries kregen. Op dat Filmfestival Sarlat hett he 2008 den Spezialpries vun’n Generalraat vun de Dordogne kregen.
Weblenken
[ännern | Bornkood ännern]- Websteed vun’n Film (nedderlandsch, engelsch, franzöösch)
- Ben X in de Internet Movie Database (engelsch)