Barrien

Dit Woort hett noch annere Bedüden: kiek dorför ünner Heinrich Schmidt-Barrien.

Barrien is vun 1974 af an en Oortsdeel vun de Stadt Syke in den Landkreis Deefholt in Neddersassen. Bit dorhen weer Barrien sülvstännig.

Laag

Tohopen mit de Oortsdelen Rist un Okel liggt Barrien in den nöördlichen Deel vun Syke un verbinnt düsse Stadt mit den Bremer Speckgördel.

Inwahners

In Barrien waast de Tall vun de Inwahners jummer mehr. 1950 leven dor 2.434 Lüde, 1966 weern dat all 3.024, 1982 sünd dat 3.987 ween un in dat Johr 2006 weern dat al 5.097. Dat warrt annahmen, dat dat woll so wiedergahn schall.

Nabers

Nabers vun Barrien sünd de Syker Oortsdelen Gessel, Rist un Okel un de Karn vun Syke süms. Vun Syke siene Nabergemeende Weyhe in'n Noorden grenzt de ehr Oortsdelen Melchershusen, Hahnfeld un Jeebel an Barrien.

Verkehr

Midden dör Barrien dör löppt de B 6 un snitt den Oort in twee Delen. Up düsse Bundstraat kann een na Noorden na Bremen, na de A 1 un na de A 27 henkamen. Na Süüden geiht dat dor na Hannober un na de A 2. De vörmalige Bahnhoff is siet 1972 bloß noch en Hollpunkt vun de DB un höört to de Bahnlien Bremen–Ossenbrügge. He liggt bi een Kilometer vun de ole Midde vun dat Dörp af. 38 mol hoolt dor Töög vun de DB, man bloß an Wekendaag.

Wat een sik ankieken scholl

• De evangeelsch-luthersche St. Bartholomäus-Karken. Toeerst weer düsse Kark romaansch. Dat is ok hüde noch to sehn. Se is toeerst ut Feldsteen boot un denn mit Backsteen fardig maakt. Dat warrt seggt, se weer woll in dat Johr 1032 grünnt wurrn. De Chor is gootsch. As de Kark 1954 wedder up Schick bröcht wurrn is, hett een dor in't Gewölv Malereen ut de late Gotik funnen. Se stammt woll ut dat 15. Johrhunnert. Altor un Predigtstohl sünd ut de Tiet vun dat Barock, just so, as de Doopsteen ut dat Johr 1660 un en grote Empoor mit allerhand Biller ut de bibelschen Geschichten. Wat de Kulturhistorie angeiht, mutt en sik besunners den olen Doopsteen ünnen in'n Toorn un de sware Platt (mensa) vun den Altor ankieken. De sünd beide noch ut de Tiet, as de Karken grünnt wurrn is.
• De Watermöhlen an de Hach. Se is 1857 boot wurrn un weer bit 1972 in Bedriev. Midderwielen is dor en lüttjet Restaurant mit Café in ünnerbröcht. Dor weert ok allerhand Saken vunwegen de Kultuur upstellt.
• Dat Daal vun de Hach mit den Möhlendiek un den Heinrich-Schmidt-Barrien-Weg.
• De ole B 6. Dat is en Allee mit dree Regen schöne Linnen.
• Up den Karkhoff an de nee B 6 gifft dat siet 2005 en Denkmol. Dat wiest up de 25 lüttje Kinner vun oosteuropääsche Frömdarbeiderschen hen, de 1944 un 1945 in dat „Polenkinnerheim“ ümkamen sünd. Dat harrn de Nazis inricht.

Verenen

Dat gifft allerhand Verenen in Barrien, as Sport-, Schütten-, Gesangverenen un de Kyffhäuser Kamroodschop.

Söhns un Döchter vun de Stadt

• Anneliese Kiehne-Tecklenburg (* 2.9.1925), plattdüütsche Schrieversche, hett allerhand Vertellen, Gedichten un Leeder schreven.
• Ursel Meyer-Wolf (* 1944), plattdüütsche Schrieversche, hett allerhand Geschichten, vertellen, Höörspelen un Leeder schreven. 1990 hett se den Kultuurpries vun den Landkreis Deefholt kregen.
• Heinrich Schmidt-Barrien (1902-1996) weer en nedderdüütschen un hoochdüütschen Dichter un Schriever. He hett Romanen, Vertellen, Theaterstücken un Höörspelen schreven. Vun 1913 - 1920 hett he in sien Öllernhuus in Barrien leevt. Vun dor ut hett he dat „Ole Gymnasium“ in Bremen besöcht.

Wapen

Dat Wapen wiest en Feld, dat blo un sülver deelt is. Baven in dat blaue Feld een gullen Waag mit Sweert, ünnen in dat sülvern feld een halvet Watermöhlenrad.

Literatur

• Heiner Büntemeyer u. Rudolf Lüdemann (Red.): Die Kirche in Barrien. Chronik zur Rettung eines Kulturdenkmals. Syke 1980, 60 S.
• Heiner Büntemeyer: Wanderwegebeschreibung im Bereich der Grundschule Barrien. (Hrsg.: Werbering Barrien e. V.), Syke-Barrien 1983, 80 S.
• Barrien. In: Heinz-Hermann Böttcher, Heiner Büntemeyer, Hermann Greve u. Wilfried Meyer: SYKE und umzu. Syke 1983, Sieten 82-120
• Barrien. In: Hermann Greve u. Gabriele Ullrich: 13mal Syke. Eine historische Lesereise. Weyhe 1992, Sieten 13-21
• Barrien. In: Hermann Greve u. Klaus Fischer (Fotos): Stadtbilder aus Syke. Leipzig 1996, Sieten 11-13
• Krötenroute. (u. a. Barrien). In: Hermann Greve u. Gabriele Ullrich: Unterwegs ... in Syke. Ein Kultur- und Naturreiseführer für Syke und seine Ortsteile. Ein Führer durch die Hachestadt. Natur- Kultur – Geschichte. Hu’e 2002, Sieten 59-83
• Heinz-Hermann Böttcher: 1962 - 2002. 40 Jahre „Lindenstraße“ in Barrien. Eine Straße im Ortsteil Barrien der Stadt Syke. Geschichte - Geschichten - Dokumente - Einwohnerlisten – Fotos. (Typoskriptdruck), Syke 2003, 260 S. m. allerhand. Biller
• Heinz-Hermann Böttcher: Es begann in der Lindenstraße ... Barrier Firmengeschichte(n) 1924 - 2004. (Typoskriptdruck), Syke 2004, 60 S. m. 29 Biller
• Heinrich Schmidt-Barrien: Barrien/Bremen. In: Aus meinen Jungensjahren. Uthlede, Hamelwörden und Barrien. 1902 – 1917. Heide 1992, Sieten 128-189 un 194/195; ISBN 3-8042-0572-0

Weblinks

• private Barrien-Website (hoochdüütsch)
• Wassermühle Barrien (hoochdüütsch)
• ev.-luth. Kirchengemeinde Barrien (hoochdüütsch)