Anton Biehl

Diedrich Christoffer Anton Biehl (* 12. Mai 1788 in Dingen; † 20. Dezember 1835 ok dor) weer en düütschen Freeheitskämpfer.

Biehl is 1788 as Söhn von en Buur in Dingen (Land Wusten) boren. As de Franzosen dat Kurförstendom Hannover besett harrn, is dat Land Wusten 1810 Deel von dat Königriek Westfalen worrn un 1811 direkt von dat Kaiserriek Frankriek. Biehl is 1812 as Munizipalraad von de Mairie Wremen beropen worrn, weer aver en groten Gegener von de Franzosen un hett den Geheembund von’n Swarten Fisch grünnt, üm de Franzosen to verdrieven.

Nadem de Russlandfeldtog 1812 fehlslahn weer, weren de Franzosen in de Defensive. As dat denn in’n Februar 1813 in Hamborg en Opstand gegen de Franzosen geven hett, wullen ok de Bewahners von Wusten, Blexen un Leh de Besatters verdrieven. Biehl hett tohoop mit Jan Rickweg en Landstorm-Trupp tohoopstellt un de Franzosen angrepen. De Besatters in de Festung Carlsborg hebbt sik an’n 12. März 1813 geven. An’n 25. März 1813 keem dat in Leh to de Slacht an de Franzosenbrügg, bi de 60 Lüüd doodbleven sünd un de de Franzosen wunnen hebbt. De Oort von de Slacht weer de Brügg över de Geest (vondaag Deel von de Stresemannstraat), de na disse Tied Franzosenbrügg nöömt worrn is. Direkt na de Slacht is Biehl flücht. En engelsch Schipp vör de Küst hett em opnahmen. Biehl hett denn bi de King’s German Legion anhüürt, weer Leutnant un hett sik op Helgoland ophollen, wat to de Tied engelsch besett weer.

Eerst in’n November 1813 hebbt denn de Russen ünner Oberst Theodor von Rüdiger de Franzosen ut Leh un Wusten verdreven.

As de Franzosen weg weren, is Biehl wedder trügg op sien Hoff, de von de Franzosen plünnert worrn is, as he op de Flucht weer. Dör slechte Ernten harr Biehl sien Hoff grote Schullen. 1835 is he an en Lungenentzündung doodbleven un op’n Karkhoff von de ole Bartelmees-Kark in Imßen begraven worrn.

De Anton-Biehl-Straat in Bremerhoben is na em nöömt.