Antall (Grammatik)

Vun Wikipedia

In de Spraakwetenschop is de Antall (ok Numerus) en grammatische Kategorie, de vertellt, woveel dat vun een Saak gifft. Un disse Antall kann dann de Wöör verännern.

Bi velen Spraken (to’n Bispeel bi Plattdüütsch) gifft dat man bloots twee Antallen:

Dat heet: wenn dat vun en Saak blots een Stück gifft, dann steiht disse Saak in de Eentall (en Huus). Man wenn dat twee oder mehr dorvun gifft, dann steiht disse Saak in de Mehrtall (twee/dree/veer Hüüs).

Man dat gifft ok Spraken, wo dat komplizeerter is: so hett t.B. Araabsch ok de Tweetall Dual. Wenn dor en Woort in de Tweetall steiht, dann is klor, dat dat dorvun twee Stück gifft, un dann bruukt man nich dat Tallwoort "twee" dorvörtosetten. Man dat gifft ok noch de Trial un de Quadral in manke Spraken, ok wenn se bedüdend minniger vörkaamt.

Anners as de Tallen gifft dat noch Formen, de ok to de Antall höört, man 'n beten annere Saken utdrückt. Dör gifft dat denn ok die Distributiv, de utdrückt, dat jichtenswat opdeelt is, de Paral, de för Nomen steiht, de dat blots in en natüürliche Tweeform gifft (as de Klüsen oder de Arms) un de Paukal, de blots lütte Mengen beschrifft.

In velen Spraken kaamt dörto noch, dat manke Wöör blots in de Eentall oder Mehrtall existeert. Solke Wöör wardt denn Singulariatantum oder Pluraliatantum nöhmt. In de plattdüütsche Spraak gifft dat ok solke Wöör. Melk, Döst oder Watt sünd Singulariatantums, Ferien, Öllers, Geswister oder Lüüd sünd tyypsche Pluraliatantums.

Vun de grammatische Antall hangt veel af: se kann de Form vun de Wöör verännern un hett Inwarken op disse Woortoorten: Substantiv, Adjektiv, Verb, Artikel un Pronomen.