Anatoli Wassiljewitsch Filiptschenko

Vun Wikipedia
Zur Navigation springen Zur Suche springen
Filiptschenko (links) un Rukawischnikow up en sowjeetsch Breefmark (1975)

Anatoli Wassiljewitsch Filiptschenko (russisch: Анатолий Васильевич Филипченко; * 26. Februar 1928 in Dawydowka bi Woronesch, Russische SFSR) is en ehmalger sowjetischer Kosmonaut.

Leven[ännern | Bornkood ännern]

Nah de School hett he eerst den Berop vun en Dreier lehrt. Later is he in de Root Armee intreeden un wurr an de Militärfleegerschool Tschugujew utbildt. Den Afsluss hett he mit Utteknung maakt. Af 1950 hett he Deenst bi de Luftstrietkräfte vun de UdSSR maakt. 1960 hett Filiptschenko sien Feernstudium an de Militärakademie der Luftstreitkräfte „J. A. Gagarin“ spoodriek afslooten.

Dree Johr later in' Januar 1963 wurr Filiptschenko as Kosmonaut utwählt. Nah sien Grundutbillen wurr he in' Juli 1965 to dat Spiral-Projekt todeelt. Hierbi sullen he un anner Kosmonauten all in en fröh Stadium an de Entwicklung vun en wedderbruukbor Ruumfähre mitwarken.

As dat all siet länger Tiet entwickelte Sojus-Ruumschipp insatzbereit weer, kreeg Filiptschenko en Utbillen as Kommandant vun dissen Typ. Sien eerste Nomineeren kreeg he as Ersatzkommandant för de Mission vun Sojus 5 in' Januar 1969.

In' Oktober 1969 keem Filiptschenko mit Sojus 7 to sien eerst Ruumfloog. He harr dorbi ok dat Kommando över den deenstölleren Wiktor Gorbatko, en Liddmaat vun de eerst Kosmonautengrupp vun de Sowjetunion un Wladislaw Nikolajewitsch Wolkow. Sojus 7 weer Deel vun en Verbundmission mit Sojus 6 un Sojus 8. Filiptschenko harr dorbi an Sojus 8 ankoppeln sullen, wat aber scheef gung.

För den Langtietfloog vun Sojus 9 in' Juni 1970 weer Filiptschenko weer Ersatz-Kommandant. Hüm toordnet weer de Bordingenieur Georgi Gretschko. Filiptschenko un Gretschko weern ansluutend för en Sojus-Floog vörsehn, bi de eerstmals dat Kontakt-Kopplungssystem utprobeert wurrn sull. Nah den Dood vun de Crew vun Sojus 11 in' Juni 1971 wurrn aber all wieder Plääns up Ies leggt.

Filiptschenko gung weer in dat Spiral-Projekt, wo he German Titow as Baas vun de Kosmonauten aflöösen dee. In' November 1972 wurr he aber in dat Apollo-Sojus-Test-Projekt beropen, dat in Tosommenarbeit mit de amerikaansch Weltruumbehörde NASA dörführt wurr. Filiptschenko wurr as Ersatzkommandant för dissen eersten internatschonalen Gemeenschapsfloog nomineert. Dormit hörr dat ok to sien Upgaav, den Testfloog mit en besünner Sojus-Version to maaken. .

Tosommen mit Nikolai Rukawischnikow is he an' 2. Dezember 1974 in Sojus 16 in't All flaagen. In de folgen Daag wurr, bit up de Kopplung, dat kumplette Programm dörspeelt, dat later vun Sojus 19 dörführt wurr. Wiels dat Apollo-Sojus-Projekt stunn he as Ersatz för Alexei Leonow parat, keem aber nich to'n Insatz.

To'n Tietpunkt vun sien Mission weer de Oberst, Held vun de Sowjetunion un Fleegerkosmonaut vun de UdSSR verheiraadt un Vader vun twee Söhns.

Weblenken[ännern | Bornkood ännern]