Amerikalien

Vun Wikipedia
Zur Navigation springen Zur Suche springen

Amerikalien is de inoffizielle Beteken vun en Iesenbahnlien in Noorddüütschland, de vundaag vör allen regional vun Bedüden is. De Streckenverloop is Oostwest utricht un verbinnt Stendal in Sassen-Anholt mit de Hansestadt Bremen. Gröttere Öörd, de op de Streck liggen doot, sünd Visselhöövd, Soltau, Munste, Uelzen un Soltwedel

Historie[ännern | Bornkood ännern]

De Amerikalien is as Karnstück vun en direkte Verbinnen vun Meideborg un vör allen ok vun Berlin mit de Havens an de Noordsee tostannen kamen. ehrn inoffiziellen Naam kreeg se dorvun, dat vele Utwannerers ut de ööstlichen Deelen vun’t Düütsche Riek na Bremerhoben föhrt sünd, woneem an de Columbuskaje Ansluss an Utwannererscheep na Amerika bestünn. In de Gegenricht weern vele Gödertöög vun Bremerhoben ut na de Riekshööftstadt ünnerwegens, de mit frischen Fisch belaadt weern. Mitünner warrt de Bahnstreck ok as Kaiserlien betekent, vunwegen dat Kaiser Willem II. hier af un to föhrt is, wenn he de Marinestüttpunkten an de Noordsee besöken de.

Op de Amerikalien weern enkelte Snelltöög ünnerwegens, de vun Berlin na Willemshoben oder vun Berlin na Nörddiek föhren deen. De Afsnitt twüschen Langwedel un Uelzen weer as Bremer Stadtbahn boet, de Afsnitt vun Uelzen wieter na Stendal weer inst vun de Meideborg-Halwerstidder Iesenbahnsellschop anleggt. Se hett den Bedrief op den westlichen Streckendeel maakt, bit se in de Preuß’schen Staatsbahn opgahn is.

De Amerikalien vundaag[ännern | Bornkood ännern]

Hüütigendaags winnt de Streck 1960 (KBS 116 – Amerikalien) wedder an Bedüden. Dat liggt to’n een an ne’en Deepwaterhaven JadeWeserPort un to’n annern an de grötteren Gödermengden vun de Havens in Bremen, för de disse Lien de gauste Verbinnen na Oosten un Süüdoosten dorstellt. De Oostdeel vun de Amerikalien nimmt butendem ok Deelen vun’n Göderverkehr ut’n Hamborger Haven in Richt Oost/Süüdoost op un deent bito as Ümleitung för de Magistrale Hamborg–Berlin.

De hele Streck warrt vun Regionalbahnen in’n Personenverkehr nütt: Bremen–Uelzen (eerstmol bit 2019) dör erixx – De Heidsprinter mit Driefwagens vun de Boreeg 0648 (LINT 41) ut den Fohrtüüchpool vun de Landsnahverkehrssellschopp Neddersassen (LNVG) un Uelzen–Stendal as RE 20 un Soltwedel–Stendal as RB 29.

Uelzen in Neddersassen, wat an de Bahnlien Hamborg–Hannober liggt, stellt geograafsch den Middelpunkt vun de „Amerikalien“ dor. Hier warrt de Bahnlien vundaag entwicklungshistoorsch, bedrieflich un fohrplaantechnisch ünnerdeelt in de utboete, elektrifizeerte Bahnlien Stendal–Uelzen un in de grotendeels noch nich elektrifizeerte Bahnlien Uelzen–Langwedel (kort: „Uelzener Bahn“).

Streckenverloop (Anklicken to’n Vergröttern)

Literatur[ännern | Bornkood ännern]

  • Ralf Roman Rossberg: Grenze über deutschen Schienen 1945–1990. 2. Oplaag, EK-Verlag, Freiburg 1991, ISBN 3-88255-829-6, S. 77

Weblenken[ännern | Bornkood ännern]