Ambrosius Lobwasser

Vun Wikipedia
Wesseln na: Navigatschoon, Söök
Ambrosius Lobwasser; Stich vun C. Meyer, 1585.

Ambrosius Lobwasser (* 4. April 1515 in Schneeberg (Erzgebirge); † 27. November 1585 in Königsbarg) weer en düütschen Schriever, Dichter un Översetter in de Tiet vun den Humanismus.

Lobwasser hett in Leipzig up Afkaat studeert. 1535 is he Magister wurrn. Denn güng he nah Frankriek un Italien. Bit 1550 hett he denn in Leipzig Ünnerricht geven. Vun 1557 af an weer he Kanzler un Rat vun den Fürsten in Meißen. Dornah hett he vun 1560 bit 1583 as Professor för Juristeree in Königsbarg leevt.

Vun 1565 af an weer he togange mit dat Översetten vun de Psalmen. 1573 hett he dat Book Der Psalter des Königlichen Propheten David rutgahn laten. He hett dorbi nich up den hebreeschen Text vun de Bibel torüchgrepen un ok nich up Martin Luther sien düütsch Översetten , man he hett sik an den Psalter vun Genf holen, de up franzöösch vun Clément Marot un Théodore de Bèze in Riemels bröcht weer. Dor harrn Guillaume Franc, Loys Bourgeois un Pierre Davantès Musik up komponeert. Düsse Öbersetten vun Lobwasser hett mehr as 100 Uplagen sehn un is bit in dat 18.Jahrhunnert in de düütsche reformeerte Karken bruukt wurrn. Een paar vun siene Gedichten staht hüdigendags noch in dat Evangeelsche Gesangbook. 1669 sünd sien Psalmen as Chorwarken mit de Melodien vun Claude Le Jeune rutkamen.