Viareggio

Vun Wikipedia
Wapen/Flagg Koort
Wapen unbekannt
Viareggio
Laag vun Viareggio in Italien
Basisdaten
Region: Toskana
Provinz: Lucca
Flach: 31,88 km²
Inwahners: 60.979 (2001-00-002001)
Inwahnerdicht: 1.912,8 Inwahners pro km²
Hööchd: 2 m över de See
Postleettall: 55049, 55048
Vörwahl: 0584
Geograafsche Laag:
Koordinaten:43° 52′ N, 10° 14′ O
43° 52′ N, 10° 14′ O
Grenzen bi OSM: 42664 42664
Gemeenslötel: 046033
Öörd in de Gemeen: 2 Stadtbezirken, 4 (Bezirken)
Börgermeester: Marco Marcucci
Websteed: comune.viareggio.lu.it
Karte

Viareggio is een Stadt in den Nordwesten vun de Region Toskana in Italien. In dat Seebad an de Tyrrheensche See warrt buten den Tourismus Marmor verarbeit' un Schepe boot. Butendem gifft dat Pöttereen.

Geografie[ännern | Bornkood ännern]

Geograafsche Laag[ännern | Bornkood ännern]

Viareggio liggt an de tyrrheensche Küst vör de Bargen vun de Apuaanschen Alpen. Bit in dat 18. Jahrhunnert weer de ganze Landstreek man slöterig Sumpland rund üm dat Meer Lago Massaciuccoli ümto. Man as de dröög leggt wurrn is, maak dat Land nu wat her. An de Küst is een vun de längsten Strännen vun Italien.

Gemeenden in de Naberschup[ännern | Bornkood ännern]

Viareggio grenzt an de Gemeenden Camaiore un Massarosa, de beide nah de Provinz Lucca tohören doot un an Vecchiano, dat nah de Provinz Pisa tohöört.

Ünnerdelen vun de Stadt[ännern | Bornkood ännern]

Dat gifft in Viareggio twee frazioni: De Stadt Viareggio an un for sik un den Oort Torre del Lago Puccini. Babenhen is Viareggio denn noch mal updeelt in veer Bezirken (circoscrizioni):

  1. Torre del Lago Puccini
  2. Centro - Marco Polo
  3. Darsena - Ex Campo d'Aviazione
  4. Viareggio Nuova

Historie[ännern | Bornkood ännern]

Viareggio[ännern | Bornkood ännern]

De Anfang[ännern | Bornkood ännern]

De Anfang vun Viareggio weer een Borg, de 1172 vun de Städer Lucca un Genua an de Küst boot wurrn is, vunwegen dat se den Landstreek gegen Pisa verdeffenderen scholl. Düsse Borg kreeg den Naamen Castrum de Via Regia, vunwegen dat de Königsstraat vun den röömschen Kaiser Friedrich Barbarossa hier an de Küst langs föhr.

De eerste Oort[ännern | Bornkood ännern]

Bi de Borg weer ok de Münn vun den Canale Burlamacca. De güng hier in de See un weer vun 1441 af an de eenzig Togang vun Lucca nah de See hen. Vun dor af an weer de Platz nu noch wichtiger un een lüttje Oort is denn dor anleggt wurrn. Vunwegen den Sump dor umto weer aber de Malaria in de Kuntreien tohuse un dat Dörp keem nich richtig in de Gängen. Al in dat Jahr 1480 hett de Stadt Lucca jedeneen, de bi de Borg boon wull, dat Booland schunken.

De Oort warrt grötter[ännern | Bornkood ännern]

1543 is een nee Festung anleggt wurrn. Dat weer de Torre Matilde. Nu weer de Oort noch beter vun Militär schützt un mehr Lüde sünd dor hentrocken. 1559 is de eerste Kark boot wurrn un 1617 is Viareggio de Setel vun den Vikar vun de Dörper up de Bargen ümto wurrn. 1701 verlehn de Republik Lucca an Viareggio dat Recht vun een communità. Dat bedüüd, de Oort dröff sik nu süms verwalten.

Striet gegen Malaria un stebigen Wind[ännern | Bornkood ännern]

Man dat konn mit de Stadt nich richtig fuddergahn vunwegen den Sump dor umto. In't 18.Jahrhunnert is de denn aber mit allerhand Möh bit 1741 dröög leggt wurrn. Vun dor af an hett sik de Malaria lütt bi lütt torüch trocken. Dormit de Stadt sik beter schulen konn gegen den stebigen Wind vun de See her, sünd denn langs denn Strand Woolden vun Pinien anplant wurrn. De maakt hüdigendags de Stadt ehr Bild ut. De süüdlich Afsnitt is vundaag een Deel vun den Reginalpark Migliarino, San Rossere, Massaciocoli.

Napoleon[ännern | Bornkood ännern]

In Napoleon siene Tied güng dat mit Viareggio just so, as mit Lucca. 1799 hett Napoleon dor een Förstendom vun maakt un hett dat siene Suster Elisa to'n Regeeren geben. Nah dat Enn vun den Diktator hett de Kongress vun Wien dor dat Hertogdom Lucca vun maakt. De eerste Hertogsche is Maria Louise vun Bourbon-Parma ween. Se hett Viareggio in dat Jahr 1820 dat Stadtrecht geben. 1847 keem Viareggi to dat Groothertogdom Toskana un güng denn mit em tosamen in dat vereente Italien up.

Seebad[ännern | Bornkood ännern]

In dat 19. Jahrhunnert güng dat mit Viareggio as een Seebad los. 1822 hett Napoleon siene Suster Pauline Bonaparte, de hier Paolina Borghese heten dö, een Villa boon laten. Dor woll se de Schummertiet vun ehr Leben tobringen. Bilüttjen sünd denn vun 1828 af an jümmers mehr Badebedrieven an de See upmaakt wurrn. Toeerst weeren Mann un Froo fein ut'enanner holen. Nah Paolina Borghese ehr Vörbild leten bannig veel Lüde in Viareggio Sommerhüser boon. Dat duur nich lang, un al in'n Anfang vun dat 19. Jahrhunnert weer de Stadt een Parl an de tyrrheensche See un een Badeoort, de international bekannt weer.

20. Jahrhunnert[ännern | Bornkood ännern]

Thomas Mann lett hier noch sien Novell Mario un de Töverer spelen. Man nah denn tweeden Weltkrieg weer dat mit de Exklusivität vun de Stadt vorbi, just so, as bi veel Öörd an de Riviera. Hüdigendags is Viareggio toeerst mal een Oort, wo de Italieners Ferien maakt. In de verleden beiden Jahrteihnten hett sik bi de Homo-Bars an den Strand bi Torre del Lago ok een Aart vun Homo-Tourismus utbreet. De warrt vun de Kommun föddert.

Torre del Lago Puccini[ännern | Bornkood ännern]

Torre del Lago is um un bi 4 km weg vun de Küst. Bit in de Midden vun dat 18. Jahrhunnert geev dat hier meist keen Minschen. Man as de Sümp dröög leggt wurrn sünd, füngen Jägers, Fischers un Buurn an un bringen dat Land in'n Stand. De Naam kümmt vun een olen Toorn ut dat 15. Jahrhunnert. De stünn dor as een Wacht öber den Lago Massaciucoli. Giacomo Puccini weer ganz hen un weg vun de Natur rund üm den See ümto un hett in dat Jahr 1891 twee Kammern in een Villa hüürt. As dat mit siene Oper Tosca so goot güng, hett he de Villa köfft un leev hier bit an sienen Dood in dat Jahr 1924. Dornah is dat Huus ümwannelt wurrn in een Gedenkstäe.

Söhns und Döchter vun de Stadt[ännern | Bornkood ännern]

Lüde, de in Viareggio leevt hefft[ännern | Bornkood ännern]

Suß noch wat[ännern | Bornkood ännern]

Elke Sommer hett 1958 mit ehre Mudder Urlaub in Viareggio maakt un is dor denn unverwohrens in een Café to de „Miss Viareggio“ köört wurrn. As vun de junge Miss Fotos maakt wurrn sünd, hefft de to Upsehn föhrt un de italieensche Filmproduzent Vittorio de Sica hett ehr vunwegen düsse Fotos nah Rom hoolt. Dor is denn ehr Karriere as Schauspelersche anfungen.

Vun 1948 af an warrt hier jedet Jahr de Coppa Carnevale utspeelt. Dat is een vun de gröttsten Footballturnieren för Jugendspelers up de Welt. Grote Spelers as Gabriel Batistuta, Allessandro del Piero un Francesco Totti hefft hier to'n eersten Mal richtig wat vun sik hören un sehn laten.

Weblinks[ännern | Bornkood ännern]