Thailand

Vun Wikipedia
Wesseln na: Navigatschoon, Söök

Dat Königriek Thailand (Thai: ราชอาณาจักรไทย) is en Staat in Süüdoostasien. Dat grenzt an Myanmar, Laos, Kambodscha, Malaysia, dat Andamaansche Meer (Deel vun den Indischen Ozean) un den Golf von Thailand (Deel vun de Pazifik). Dat Land wurrd as konstitutionelle Monarchie mit König Bhumibol Adulyadej as Staatsböversten regeert, de all 1946 to’n König ernannt wurrn is. De Hööftstadt un ok de mit Afstand gröttste Stand vun dat Land is Bangkok.

De etwa 64 Million Bewahner sünd to 75 % Thai un to etwa 15 % Chinesen; en muslimisch Minnerheit, de Malayen, leevt in Süüdthailand. De Buddhismus is de domineerend Religion vun dat Land. De Thai sünd eerst in dat 11. Johrhunnert in dat hüdige Thailand inwannert. Se hebbt mehrere Königrieken grünnd, de in de folgend Johrhunnerten vereenigt wurrn. To de Tiet vun de Kolonialismus bleeven se unafhängig. Nah den Tweeten Weltkrieg wurr Thailand faken vun dat Militär diktatorisch regeert, is aber to glieker Tiet ok mit de Wertschap good vörankommen un hett sück to en vun de wertschaplich führend Staaten in Süüdoostasien entwickelt. In de letzt Johren geev dat faken binnenpolitisch Utnannersetten, de de Sellschap ok temelk erschüttert hebbt. Siet Midden 2009 hett sück de Laag aber weer wat beruhigt. In Süüdthailand is aber separatistisch motiveert Gewalt up de Daagsördnung.

Geographie[ännern | Bornkood ännern]

Da Rebeet vun Thailands nimmt en bannig grooten Deel vun de Landflach vun Süüdoostasien in un reckt vun de letzten Utloopers vun de Himalaya in’ Süüdoosten bit up de Malaiische Halfinsel un umslutt dorbi den Golf von Thailand, en Randmeer vun dat Süüdchineessch Meer. De Landflach vun Thailand erinnert in hör Gestalt an de Kopp vun en Elefant. De maximal Utdehnung in Noord-Süüd-Richtung liggt bi 1.770 Kilometer, in Oost-West-Richtung en beten mehr as 800 Kilometer. Insgesamt hett Thailand en Rebeet vun 513.115 Quadratkilometer.

De Noordregion is bargig, dor is ok de hööchste Punk vun dat Land: Doi Inthanon (2565 Meter). De Noordosten (Isaan – ok Isan oder Issaan nömmt) besteiht ut de Khorat-Hoochebene, en in’ Sömmer stoffdrööch, in de Regentiet aber överswemmt Landschap, de kien intensiv Landwertschap tolett. Bewässerungsprojekte un Staudämme söllt hier Afhülp schaffen. De dortige Bevölkerung is armer as de Dörsnitt vun dat Land. De Dialekt vun dat Isaan steiht dem Laotischen nah. In’ Noorden un Osten vun de Isaan bildt de Mekong de Grenz to Laos.

De Zentraalregion wuurd beherrscht vun de Chao Phraya, de dat fruchtbar Land Water toführt un süüdlich vun Bangkok in den Golf von Thailand münd. De Ostregion is landwertschaplich präägt un liggt an’ Golf von Thailand. De muie Strände un de vörlagert Eilannen hebbt to en verstarkten Tourismus führt. De Zentraalebene un de Ostküst (Eastern Seaboard) sünd dat wertschaplich Hart vun dat Land, Thailand is Liddmaat vun de Grupp vun de Twintig. De Süüdregion liggt up de langstreckt malaiisch Halfinsel, de de Pazifik vun den Indischen Ozean trennt. De Isthmus vun Kra is de schmalste Stäh tüschen de beid Meeren un is blots 64 Kilometer breet. Dorüm wurrd he ok in Thailand as „dünn Hals“ betekent. Barglandschapen (in de nöördlich Deel vun dat Tenasserim-Gebirge an de Grenz to Myanmar, in’ butersten Süüden dat Grenzgebirge Sankalakhiri to Malaysia), Regenwald un Dröömstrände wesseln sück af. De Bevölkerung is hier tonehmend mosleemsch un snackt mehr Malaiisch.

Gröötere Städer sünd neben de Hööftstadt Bangkok: Chiang Mai, Nonthaburi, Samut Prakan, Nakhon Ratchasima (fröher Khorat), Khon Kaen un Chonburi.

To Thailand hörrt ruch weg 100 Eilannen.